Светот е „апсајд даун“, би рекле наопаку поставен. Ова е орвелијански свет во кој велат мирот е војна, а војната е мир. Сега тука веќе таблата се менува и реториката и тие квалификации не важат. Мораме да се сослушаме, а не стави му некому етикета и готово тој нема право веќе да ја каже позадината на тоа твое тврдење. Така што да, ја сум суверенист во смисла на тоа дека Македонија не смее да биде колонија и ова што ни го приредија во овие 30 години е нешто што ни една генерација нема да ни го прости, вели Билјана Ванковска, претседателскиот кандидат на Левица за претстојните избори, која беше запрашана зошто левичарите денеска се суверенисти, а конзервативците се глобалисти, иако тоа во минатото не беше случај.

Во утринската програма на Слободен печат, Ванковска говореше за својот однос кон договорите што ја дефинираат внатрешната и надворешната позиција на Македонија, сметајќи дека рамковниот, преспанскиот и договорот за добрососедство се штетни за нашата земја.

Што се однесува до НАТО, таа вели дека е исклучиво против членството на Македонија во каков било воен сојуз. За Европската Унија, пак, Ванковска вели дека ѝ недостасува демократски капацитет, иако не ја отфрла идејата за наше полноправно членство во Унијата.

На прашањето дали е антиалбански кандидат, таа порача дека е космополит, додека за тоа дека пропагира руско влијание во Македонија, ја истакна негативната руска историска улога и формирањето на Санстефанска Бугарија, која директно оди на штета на Македонија. Во однос на војната во Украина кажа дека се работи за класична инвазија на Русија, со што е прекршено меѓународното право.

Таа ги демантираше шпекулациите дека зад нејзината кандидатура во заднина стојат поголемите политички партии.

– Некој шпекулираше дека СДСМ ќе ми ги собере потписите, а други, пак, тврдат дека ВМРО ми ги собира потписите за потоа во вториот круг да ја вратам поддршката – истакна Ванковска.

Повеќе од интервјуто на Билјана Ванковска погледнете во видеото во продолжение.