На Денот на ослободување на Скопје, 13 Ноември „Слободен печат“ ги праша граѓаните дали знаат зошто се слави денешниот ден. Најголем дел од анкетираните знаат што е 13 Ноември, но имаше и неколкумина кои не знаеја зошто се слави.

– Па ден на ослободување на Скопје. Голем празник, само треба да се почитува и да се слави. И сите да го цениме тој ден – рече една повозрасна госпоѓа.

– Како да не знам, јас сум возрасен човек којшто го славел, и пак ќе го славиме денот на ослободувањето на мојот роден град Скопје – кажа случаен минувач.

Од анкетата можеме да заклучиме дека поголем процент од повозрасното население, знаеше што се случило на 13 ноември, а добивме и по неколку негативни одговори од помладите кои не знаеја за настанот кој се случил на овој ден во 1944 година.

– Ослободување на Скопје мислам дека е, на градот. Од фашистите, од окупаторот. Јас сум од постарите, знам. Има некој што не знае? – гордо праша една повозрасна скопјанка.