Две израелски групи за човекови права, Б’Целем и Лекари за човекови права, вчера изјавија дека Израел врши „геноцид“ во Појасот Газа, и се првите големи гласови во израелското општество кои го изнесоа обвинението против владата, која категорично го негираше тоа.

„Ништо не ве подготвува за сфаќањето дека сте дел од општество кое врши геноцид. Тоа е длабоко болен момент за нас“, рече Јули Новак, извршен директор на Б’Целем, во изјава објавена заедно со прес-конференцијата во Ерусалим за презентирање на извештаите на невладините организации.

„Извештајот што го објавуваме денес е таков што никогаш не замислував дека ќе треба да го изработиме“, рече Новак. „Луѓето од Газа се раселени, бомбардирани и целосно лишени од нивната човечност и права“, додаде таа.

Извештајот на Б’Целем се базира на анализа на сведоштва, статистика и факти за израелската политика во текот на повеќе од 20 месеци.

„Испитувањето на израелската политика во Појасот Газа и нејзините ужасни последици, како и изјавите на високи израелски политичари и воени функционери за целите на нападот, нè води до неоспорен заклучок дека Израел спроведува координирана акција насочена кон намерно уништување на палестинското општество во Појасот Газа“, се нагласува во извештајот на Б’Целем.

Од своја страна, „Лекари за човекови права“ се фокусираа на „намерното и систематско расклопување на здравствениот систем во Газа“ и заклучија дека операциите на Израел во Газа „ги исполнуваат критериумите за геноцид како што е дефинирано во Конвенцијата за спречување и казнување на кривичното дело геноцид, чиј потписник е Израел“, според заедничката изјава на двете невладини организации.

Дејвид Меншер, портпарол на израелската влада, нагласи дека Израел „силно го отфрла ова обвинение“.

„Нема намера (што претставува) основа за обвинението за геноцид (…) едноставно нема смисла една земја да испрати 1,9 тони помош, од кои поголемиот дел е храна, ако има намера да изврши геноцид“, рече тој.

И израелската војска ги отфрли заклучоците од извештаите како „неосновани“, нагласувајќи дека се придржува до меѓународното право и презема невидени мерки за да осигури дека цивилите нема да бидат повредени, додека Хамас ги користи како „човечки штитови“.

Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галанд бидејќи постојат сомневања дека извршиле воени злосторства и злосторства против човештвото.

Во исто време, Јужна Африка поднесе жалба до Меѓународниот суд на правдата, обвинувајќи го Израел за извршување „геноцид“ во Појасот Газа.

Војната во Газа започна по невидениот напад на Хамас врз Израел на 7 октомври 2023 година, во кој загинаа 1.219 лица – претежно цивили – според пресметката на АФП.

Како одговор, Израел започна големи воени операции во палестинската енклава, кои досега предизвикаа смрт на најмалку 59.920 лица, главно жени и деца, според податоците од Министерството за здравство на Хамас.