Пожарот во Валандовскиот регион, и покрај целодневните напори за гаснење, утринава околу 5 часот повторно се реактивирал, поттикнат од силниот и топол ветер. Во гаснењето се ангажирани повеќе од 50 лица на терен, информира Центарот за управување со кризи (ЦУК).

Во моментот е зафатена голема површина, при што пожарот е распространет во два огнени крака: едниот се движи кон месноста Казан дол и Фурка, а вториот кон општина Богданци.

Двајца повредени при успешното гаснење на пожарот во Валандовско

– Во 15:12 часот, Градоначалникот на Општина Валандово преку бројот 112, како и по електронска пошта, упати барање до Центарот за управување со кризи (ЦУК) за ангажирање воздушна поддршка. ЦУК, согласно Стандардно оперативните процедури, го процесуираше барањето и веднаш го упати до Хеликоптерската единица на МВР. Од страна на МВР беше известено дека, поради технички причини, моментално не се во можност да обезбедат хеликоптерска поддршка – се вели во соопштението.

Дополнително, ЦУК достави барање и до Дирекцијата за заштита и спасување (ДЗС), но до овој момент сè уште нема одговор.

– Паралелно, испратено е и барање до Генералштабот на Армијата за можност за ангажирање воздушна поддршка, и се очекува одговор и од нивна страна – велат од ЦУК.

Станува збор за сериозен пожар кој зафаќа голема површина со населени места од расфрлан тип, што претставува потенцијална закана за животот и здравјето на населението, како и за објекти, имот и инфраструктура во регионот зафатен од пожарот.