Фудбалерите на Вардар ја забележаа втората победа на подготовките во Словенија, совладувајќи го романскиот Рапид Букурешт со минимални 1-0.

Стрелец на единствениот погодок беше Горан Закариќ, кој уште во осмата минута го матираше голманот Столц со прецизен и силен удар од десната страна. Иако мечот не изобилуваше со темпо и шанси, тоа не изненадува ако се има предвид дека двете екипи сè уште се наоѓаат во фазата на подготовки и тактичко воигрување.

За потсетување, вардарци претходно славеа над Будуќност од Подгорица со убедливи 3-0, а беа поразени од словенечка Олимпија со 0-2. Последен тест за „црвено-црните“ пред враќањето во Скопје ќе биде контролниот натпревар против Марибор, закажан за 28 јуни со почеток во 17:30 часот.

Првиот официјален предизвик ги очекува на 10 јули, кога во рамки на квалификациите за Конференциската лига ќе го пречекаат тимот на Ла Фиорита на домашен терен.