Атмосферата во пристаништето Агиос Николаос на Крит, стана напната по пристигнувањето на крузерот „Краун Ирис“, кој превезуваше приближно 1.500 патници од Израел.

Жителите на областа се собраа на местото, одговарајќи на повикот на Иницијативата за солидарност за палестинскиот народ, која најави мирен и симболичен протест.

Според e-kriti.gr, жителите излегле на пристаништето во областа држејќи транспаренти со пропалестински слогани на кои пишувало „Стоп на геноцидот“ и „Ционизам-фашизам“, а го закачиле и знамето на земјата, изразувајќи ја својата солидарност со палестинскиот народ.

Иницијативата за солидарност повика на масовна, мирна мобилизација, и покрај јавните предупредувања од владата за можна криминализација на ваквите дејствија. Министерот за заштита на граѓаните, Михалис Хрисохоидис, најави репресија во случај на слични настани и инциденти како оние на Сирос.

Полицијата и крајбрежната стража се во состојба на зголемена готовност во Агиос Николаос поради пристигнувањето на израелскиот крузер. Полиција од целиот остров Крит пристигна на пристаништето Агиос Николаос со цел да се обезбеди непречено истоварување на туристите, како и контролирано и безбедно одвивање на протестот.

Како што објави creta24.gr, полицијата веќе ги изврши првите апсења.

Според cretalive.gr, за време на заминувањето на автобусите што ги превезуваа израелските патници од крузерот во Хераклион, на пат кон Кносос, некои луѓе фрлаа шишиња и други предмети кон возилата.

Полицијата одговори со употреба на хемиски средства и го блокираше подрачјето, предизвикувајќи голема тензија. Резултатот беше задушлива атмосфера, со неколку луѓе, вклучувајќи деца, кои плачеа и се чувствуваа непријатно.

Инаку вчера беше предизвикана и тензија во пристаништето Родос, бидејќи неколку демонстранти протестираа против присуството на крузерот „Краун Ирис“.