ВИДЕО | Стивен Колберт го опцу Трамп во живо, откако минатата недела беше откажано неговото шоу
Минатата недела, „Си-би-ес“ објави дека планира да ја откаже емисијата „Лејт најт шоу со Стивен Колберт“ по завршување на следната телевизиска сезона, а телевизијата појасни дека ова е чисто „финансиска одлука“. Само неколку дена пред да ја добие веста за неговото отпуштање, Колберт ја опиша спогодбата со Трамп како „голем поткуп“. Во понеделник вечерта, тој имаше убави зборови за „Си-би-ес“, но исто така ја праша публиката: „Како може ова да биде чисто финансиска одлука кога „Лејт најт шоу“ е број еден по гледаност?“
Препорачано
Стивен Колберт му возврати на Доналд Трамп со карактеристичен сарказам откако американскиот претседател го поздрави откажувањето на неговото „Лејт најт шоу“. По изненадувачката објава дека најгледаната емисија на Колберт се откажува следната година, Трамп се огласи на својата социјална мрежа, Truth Social.
„Многу ми е мило што Колберт доби отказ. Неговиот талент беше помал од неговата гледаност“, напиша Трамп.
Во понеделник вечерта, во својата прва емисија откако ја доби веста за откажувањето, Колберт му одговори на Трамп: „Како се осмелувате, господине? Дали еден неталентиран човек би бил способен да ја смисли следната сатирична шега?“ Потоа го опцу Трамп, а неговите зборови беа покриени со звучен сигнал, пренесува „Њујорк пост“.
„Си-би-ес“ минатата недела објави дека „Лејт најт шоу со Стивен Колберт“ ќе заврши во мај 2026 година, означувајќи го крајот на 33-годишната телевизиска франшиза што Колберт ја води од 2015 година. Телевизијата го опиша Колберт како „незаменлив“ и рече дека одлуката за откажување на шоуто е „чисто финансиска“, наведувајќи ја зголемената конкуренција во телевизискиот пејзаж доцна навечер. Тие тврдат дека тоа не е поврзано со комичната содржина или деловните превирања во рамките на „Парамаунт Глобал“, сопственикот на „Си-би-ес“.
Трамп во последните месеци изнесе сериозни обвинувања против „Си-би-ес“. Тој тврдеше дека уредниците на информативната програма „60 минути“, која се емитува на американската телевизија повеќе од половина век, монтирале интервју со Камала Харис, неговата претседателска ривалка, за да ја прикажат во подобро светло.
„60 минути“ ги негираше обвинувањата и објави транскрипт од интервјуто, но Трамп поднесе тужба. Парамаунт на крајот се согласи на спогодба од 16 милиони долари со Трамп. Договорот покрена прашања и загриженост бидејќи на Парамаунт му е потребно одобрение од американската влада за долго преговарана промена на сопственоста. Парамаунт, истакната холивудска компанија која се бори во ерата на стриминг, се обидува да се спои со Скајденс Медиа, но ѝ е потребно одобрение од Федералната комисија за комуникации.
Минатата недела, само неколку дена пред да ја добие веста за неговото отпуштање, Колберт ја опиша спогодбата со Трамп како „голем поткуп“.
