Шпанија денес објави дека од воздух исфрлила 12 тони храна во Појасот Газа, чии жители се загрозени од глад, според ОН, по 22 месеци војна меѓу Израел и Хамас.

„Шпанија учествува во мисијата за хуманитарна помош по воздушен пат користејќи воен авион на нашите воздухопловни сили, А400“, објави шпанскиот министер за надворешни работи Хозе Мануел Алварез, објавувајќи видео од операцијата на Икс.

Вкупно се фрлени 24 пакети, „од кои секој содржеше 500 килограми, односно вкупно 12 тони храна, што е еквивалентно на „приближно 2.500 порции“, додаде тој.

Por Gaza

@AECID_es @MAECgob @Defensagob pic.twitter.com/Gam8ImqyDt

— José Manuel Albares (@jmalbares) August 1, 2025

Покрај овие воздушни достави, кои шпанската влада ги објави претходно оваа недела, Алварез истакна дека „камиони што носат шпанска хуманитарна помош“ во моментов се „паркирани на границата со Појасот Газа“ чекајќи да влезат во енклавата.

„Воздушната рута е очигледно несоодветна (…) Израел мора дефинитивно да ги отвори сите копнени премини за да може хуманитарната помош масовно да влезе“ во Појасот Газа, инсистираше шпанскиот премиер, барајќи „прекин на огнот што ќе овозможи дистрибуција на помош“.

Неколку западни земји, вклучувајќи ги Франција и Велика Британија, во последните денови одлучија да испратат помош по воздушен пат до палестинската енклава, која се соочува со драматична хуманитарна криза, по земјите од Блискиот Исток.

Сепак, шефот на агенцијата на ОН за палестински бегалци (UNRWA), Филип Лазарини, нагласи дека воздушната достава на помош нема да „го запре влошувањето на гладот“.

„Тие се скапи, неефикасни и дури можат да убијат гладни цивили“, додаде тој во објава на Икс.