Руските истражни органи отворија кривична постапка против новинарка од Краснојарск, осомничена за ширење наводно „лажни информации“ за руската армија. Жената е уапсена, соопшти прес-службата на Истражниот комитет за Краснојарската територија и Република Хакасија, пренесува Инфо24.

Според истрагата, во мај 2023 година новинарката објавила материјал во медиум кој руските власти го означиле како „странски агент“. Во текстот, тврдат истражителите, биле содржани „намерно лажни информации“ за активностите на вооружените сили во зоната на воени операции. За тоа, таа наводно добила 64.000 рубли (околу 659 евра).

Жената, чиј идентитет не бил официјално објавен, е приведена и наскоро ќе биде испрашана. Истражните органи најавија дека продолжуваат со собирање докази и спроведување на потребните дејствија.

РИА Новости, повикувајќи се на извор, објави дека станува збор за новинарката Светлана Хустик, која работи за „Сибир.Реалии“ – медиум кој руското Министерство за правда го има впишано на списокот на „странски агенти“.