Илјадници луѓе го одбележаа националниот празник на Австралија со протестни собири наречени „Ден на инвазијата“ за поддршка на домородната заедница во земјата, повикувајќи да се укине Денот на Австралија или да се помести датумот на прославата.

Денот на Австралија го одбележува денот кога Велика Британија ја основа државата Нов Јужен Велс како казнена колонија, пристигнувајќи во сегашен Сиднеј со „Првата флота“ која донела колонисти и осуденици.

Многу луѓе го слават празникот со скари и патувања на плажа, а исто така е популарен датум кога некои имигранти добиваат австралиско државјанство.

Но, многу домородни Австралијци, кои сочинуваат 3,8 отсто од 26-те милиони жители на земјата, го отфрлаат празникот како почеток на неправдите претрпени од европската колонизација.

Tens of thousands of people have swarmed the CBD to protest against Australia Day. Indigenous leaders called for a day of mourning to be declared and better recognition of First Nations people | @BySamMills pic.twitter.com/QYJ8lDgS4y

— 10 News First Melbourne (@10NewsFirstMelb) January 26, 2024

Во Сиднеј, илјадници демонстранти, многумина вееја домородни знамиња, се собраа во центарот на градот на митинг „Денот на инвазијата“ пред маршот кој ги затвори околните градски улици.

Водачот на абориџинската заедница Адријан Бурагуба рече дека дошол на митингот „да им каже на луѓето дека Денот на Австралија не ни значи ништо“. „Ова е Ден на суверенитетот на Абориџините“, рече Бурагуба.

Демонстрантот Џејмс Камингс, жител на Сиднеј, рече дека „не е вистинскиот ден да се прослави национален ден“.

„Едно од важните прашања за кои маршираме денес е да најдеме посоодветен ден за славење на нацијата“, рече Камингс.

Слични собири се одржаа и во други поголеми градови, вклучувајќи ги Мелбурн во Викторија, Бризбејн во Квинсленд и Хобарт во Тасманија.

Домородните Австралијци кои ја населиле земјата пред најмалку 65.000 години се меѓу најранливите групи во земјата и се соочуваат со проблеми, вклучително и лоши здравствени и образовни резултати и високи стапки на апсење.

И покрај повиците за промена на датумот на Денот на Австралија на 26 јануари, владејачката Лабуристичка партија предводена од премиерот Ентони Албанезе го отфрли таквиот потег. Говорејќи на церемонијата за добивање државјанство во Канбера, Албанезе рече дека тој ден е „наша можност да застанеме и да размислиме за сето она што го постигнавме како нација“.

Два споменици на колонијални личности беа вандализирани во Мелбурн претходно оваа недела пред контроверзниот државен празник.