Активист за човекови права во рускиот регион Башкортостан е осуден на четири години затвор, откако судот го прогласи за виновен за поттикнување етничка омраза. Поради ова избиле судири меѓу неговите приврзаници и полицијата, пишува Ројтерс.

Независните руски новински агенции објавија дека полицијата употребила солзавец и апсела откако избила тепачка со голема толпа луѓе кои се собрале за поддршка на активистот Фаил Алсинов. Се уште не се знае колку лица се приведени.

Алсинов е обвинет за навреда на работниците мигранти во говорот што го одржал минатиот април на протест против плановите за ископување злато во Башкортостан, лоциран во јужниот дел на Русија, во близина на границата меѓу Европа и Азија.

In Bashkortostan in Russia, clashes began with police officers over the verdict of a local activist, who was sentenced to 4 years in prison. After the verdict was announced, several thousand people came to the court to protest. Brawls broke out, tear gas and stun grenades were… pic.twitter.com/B8mcUefM3M

— NOELREPORTS ?? ?? (@NOELreports) January 17, 2024

Неговите приврзаници тврдат дека случајот против него е одложена одмазда за неговата улога во протестите пред неколку години во кои активисти успешно ги блокираа плановите за ископување на рид кој локалното население го смета за свет.

„Голема благодарност до сите што дојдоа да ме поддржат. Ова никогаш нема да го заборавам. Не ја признавам својата вина. Отсекогаш сум се борел за правда, за мојот народ, за мојата република“, изјави Алсинов.

На видеата објавени на социјалните мрежи се гледаат стотици луѓе собрани во близина на судот во градот Бајмак, 1.380 километри источно од Москва. Некои извештаи велат дека имало неколку илјади. На социјалните мрежи се појавија снимки од конфликтот на кои се гледа како демонстрантите фрлаат пелети кон полицајците.

Големите протести во Русија се исклучително ретки поради ризикот од апсење на собири кои властите ги сметаат за незаконски. Илјадници луѓе беа приведени во последните две години поради противење на војната во Украина.

Башкортостан, претежно муслиманска република со 4,1 милиони жители, е еден од повеќе од 80 ентитети што ја сочинуваат Руската Федерација. Алсинов бил лидер на Башкорт, локално движење за зачувување на културата, јазикот и етничкиот идентитет на луѓето во регионот, кое беше забрането како екстремистичка организација во 2020 година.