Во малото село Бегниште во Тиквешијата викендов, по повод православната Нова година може да се следи традиционалниот и автентичен џоломарски обичај од ризницата на македонското културно наследство. Џоломарите со зацрнети лица и овојпат со звуците на тешките ѕвонци и клопотарци ќе ги истеруваат лошите духови и злото од старата година, за новата да донесе плодност, среќа и бериќет.

Селото последниве години ја доживува истата судбина на стотици други македонски села – куќите се празни, младите заминуваат на печалба или во градовите или пак во странство, остануваат само мал дел повозрасни жители.

Но, токму Џоломарите се причина на стара нова година, помеѓу 13 и 14 јануари селото повторно да заживее со сиот свој сјај, куќите да се наполнат зошто тогаш се враќаат дури и оние кои заминале преку Океанот, за овој празник да го поминат во семејниот дом, со своите родители и роднини.

Екипата на „Слободен печат“ токму во овој период минатата година го посети селото и ги сними древните пагански ритуали кои се пренесуваат од колено на колено, мистичната игра на маскираните Џоломари, кои со клопотарците се борат против злото, за напредок, среќа и бериќет на заедницата.

Покрај Џоломарите чекори и грбава баба облечена во црна облека која ја претставува старата година која заминува, и две невести во бела селска облека кои ја симболизираат новата година која треба да донесе поубави работи. Невестите низ селото ги водат на магаре, а предводник на ритуалната игра е магаричарот кој ги благословува домаќините во чии дворови влегува,  а за возврат добива пари и подароци.

Овој обичај се практикува во таканаречените некрестени денови помеѓу Божиќ, денот на Христовото раѓање и Водици, денот на Христовото крштевање кога, според верувањата, на земјата крстосувале нечесни и зли сили, со кои преку разни ритуали и игри народот се обидувал да се спротивстави и да победи во борбата со злото, за да обезбеди напредок, плодност и благодет во годината која доаѓа.

Во продолжение погледнете го краткиот документарен филм во продукција на „Слободен печат“ кој го креираа Марина Дамческа, Никола Колев и Драган Митрески.