Околу сто деца секојдневно питачат на улиците низ Скопје. „Бизнисот“ им почнува од 9 часот наутро, а смената им завршува во 22 часот. Околу 2.000 деца се во критична здравствена состојба, а како последица на користење на лепило починале три дечиња на возраст до седум години, вели Илија Јовановиќ од невладината организација „Градиме иднина“, кој и самиот припаѓа на ранлива категорија, како дете кое пораснало во Домот за деца без родители „11 Октомври“.

Тој денеска во Утрински брифинг ги повика институциите сериозно да се занимаваат со проблемот со питачење на децата, а возачите да не им даваат пари за да ги демотивираат во иднина да не питачат.

– Наместо да им давате денар или два, на питачите кои ќе ги сретнете на семафор, понудете им работа. Верувам дека има многу граѓани кои поседуваат приватни фирми и доколку сакаат можат да им помогнат со тоа што ќе ги вработат како технички персонал во нивните фирми. Да не дозволиме овие деца и возрасни да бидат изложени на екстремно ниски или високи температури. Три деца на возраст помали од 7 години, починаа од високите температури и дување лепак, алармира Јовановиќ.

Тој вели дека питачењето воопшто не е наивно, а според неговите сознанија буквално се води битка за да се добие семафор за питачење на нафреквентните улици.

– Постои битка за булевари, најпрофитни се крстосниците во Карпош, кај Соборен храм и на патот за Момин Поток. Овие булевари ги изнајмуваат банди, кои потоа за да им дозволат на питачите тука да „работат“ им земаат дел од заработените пари. Значи станува збор за голема злоупотреба, тврди Јовановиќ.

Невладината организација која тој ја раководи веќе има осмислено стратегија како долгорочно да се реши овој проблем.

– Ќе бараме од МВР да бидат поангажирани на терен, а од внатрешна контрола ќе бараме да ги санкционира полицајците кои не си ја вршат работата. Да се вклучи и МТСП со тоа што во соработка со компаниите ќе ги вклучи питачите на пазарот на трудот. Во решавање на овој проблем мора да се вклучат општините и Центрите за социјална работа. На несовесните родители да им се одземе социјалната помош, дури и родителско право иако е ригорозен потег, сепак треба почесто да се применува кога не постои друг начин детето кое питачи да се тргне од улица. Имам сознанија дека родителите ги злоупотребуваат своите женски деца под 14 годишна воздраст, со тоа што за пари ги присилуваат на стапување во брак или давање сексуални услуги, нагласува Јовановиќ.

Јовановиќ алармира дека постоечките дневни центри не функционираат како што треба и апелира до пратениците да донесат Закон за вработување на сите маргинализирани групи.

Од Министерството за труд и социјална политика велат дека во Скопје функционираат два дневни центри за деца на улица.

– Во моментот на територијата на град Скопје  функционираат два дневни центри за деца во ризик (деца на улица) во Кисела Вода и Шуто Оризари. Дневниот центар во Кисела Вода е организациона единица на ЈУ Меѓуопштински центар за социјална работа на град Скопје, а другиот дневен центар е во Шуто Оризари, и е менаџиран од Здружението „Заштита на правата на детето“. Во двата дневни центри за деца на улица, дневно ротираат околу 50 деца.Со услугата за дневен престој се обезбедува дневно згрижување, исхрана одржување лична хигиена, индивидуални активности за стекнување животни вештини, воспитни, социјални, културни и рекреативни активности, превентивни активности, советување, едукација, образовна поддршка, социјална поддршка на децата и нивните семејства и други сродни активности, во зависност од потребите на децата. Во дневниот центар децата поминуваат еден дел од денот, каде што се чувствуваат сигурни и згрижени. Со помош на стручните лица од дневниот центар  тие добиваат  можност за задоволување на нивните потреби, во зависност од индивидуалните карактеристики на секое дете. Основната улога на дневниот центар е отстранување на децата од улица и нивна инклузија односно вклучување во општеството преку усвојување на различни социјални вештини и можност за вклучување во образовниот систем, велат од МТСП.

Од МВР брифираат дека полицијата не постапува сама, туку во соработка со Центрите за социјална работа излегува на улица и помага за децата да се тргнат од улиците.