По неколкуте обелоденети случаи каде месно население не е прашано за согласност околу изградбата на мали хидроцентрали на реките од кои тие се снабдуваат со вода, Слободен печат го праша министерот за животна средина Насер Нуредини дали ќе се преиспитуваат и оние концесии за мали ХЕЦ каде не е почитувана законската обврска за консултација на јавноста.

„Одлуките за овие хидроцентрали се донесени од Владата пред мојот мандат. Ако постои загриженост кај граѓаните, секогаш треба да се побара мислење кај општините на чијашто територија се градат, а ако има евентуални противзаконски дејствија, заедно со Инспекторатот за животна средина ќе ги разгледаме тие случаи, рече Нуредини по денешната средба со локалното население на Средно и Долно Коњари, кои бараат итно одземање на концесијата за црпење на песок од Пчиња која ги загрозува нивните домаќинства и водата за пиење.

Нуредини децидно истакна дека „доколку се утврди дека имало нешто противзаконско, нормално таквите дејствија ќе бидат запрени“.

Според важечките закони и уредби на Владата, на издавањето на концесии за експлоатација на водата за производство на струја, како и за црпење на речен песок од коритата на реките задолжително мора да му претходи процес на консултации на засегнатата јавност, односно на локалното население кое живее блиску до тие реки, како и на граѓанските организации и одржување на јавни расправи. За дел од концесиите, меѓутоа, локалното население не било информирано и не биле одржани јавни расправи, а концесии сепак биле издадени.

Еден од примерите е и концесијата на реката Шталковица кај пробиштипското Турско Рудари, каде локалното население започна со блокади на локалниот пат во знак на протест поради изградба на мала ХЕЦ. Истиот концесионер, ДИС Енергија најавува почеток на градба на хидроцентрала на Мала Река крај Кочани, за кој исто така не била консултирана јавноста.

Со песокот од Пчиња се „исцрпува“ и животот во Горно Коњари