Претседателот на Судски совет Александар Камбовски очекува ефикасно и ефективно да се спроведе постапката, односно судењето за Кочани, а новиот претседател на Врховен суд Африм Фидани ги објасни причините зошто одлучиле предметот да се суди во Кривичниот суд во Скопје кој сега доби и нов ВД претседател.

– Очекувам ефикасно и ефективно да се спроведе постапката и да ја добијат и граѓаните и државата и сите ние да добиеме едно правично и фер судење во кое се надеваме дека тој што треба да одговара ќе одговара, ако е некој погрешно обвинет да биде ослободен – рече Камбовски.

Фидани рече дека ценеле дека најцелисходно би било предметот за пожарот во т.н. кабаре „Пулс“ во Кочани, што беше оформен по поднесен обвинителен акт од кочанското Основно јавно обвинителство да се прати во Основниот кривичен суд во Скопје.

– Претходно одржавме состанок на кривичниот оддел и го разгледавме предметот, по што се формираше совет за одлучување. Ги анализиравме сите укажувања што беа дадени од страна на Апелацискиот суд Штип и увидовме дека најцелисходно би било предметот да се оформи во Основниот кривичен суд Скопје – рече Фидани.

На прашањето за причините поради кои предметот не може да се суди во судовите од штипското апелациско подрачје, Фидани објасни дека извештајот од штипска Aпелација укажувал на одредени проблеми.

– Што се однесува до Основниот суд Кочани, каде јас бев исто така одговорен и подобро ги знаев околностите таму, недостасуваат човечки ресурси, пред сѐ судии. Штипска Aпелација направи и анализа за состојбата со другите судови со проширена надлежност на подрачјето на штипска Апелација. Ги анализиравме сите аспекти и ценевме дека најцелисходно би било предметот да се прати во Основниот кривичен суд во Скопје – додаде тој.

Фидани денеска даде свечена заклетва во Судскиот совет по повеќе од еден месец откако беше избран на функцијата на седница на Судскиот совет.

– Изјавувам и се колнам дека функцијата претседател на Врховниот суд на Република Северна Македонија суд ќе ја вршам чесно, совесно, независно и одговорно, ќе ги почитувам Уставот и законите на Република Северна Македонија и дека ќе ги почитувам слободите и правата на Граѓанинот – рече Фидани.

„За“ избор на Африм Фидани за претседател на Врховниот суд на 26 мај гласаа осум членови на Судскиот совет.