Познатиот холивудски актер Метју Меконахи (55) неодамна ги откри деталите за комплицираниот однос со својата мајка Кеј, поради кој цели осум години не сакал да комуницира со неа, освен кратки телефонски повици секоја недела. Причината биле сериозни проблеми со довербата во рамки на семејството.

Сè што ќе ѝ кажел завршувало во медиумите

Главниот проблем бил тоа што неговата мајка редовно ги споделувала нивните приватни разговори со новинарите. За списанието „Пипл“, Меконахи објаснил како изгледал тој период од животот.

„Осум години морав да внимавам што зборувам за време на нашите неделни телефонски повици“, вели актерот.

„Ѝ кажував нешто во недела, доверливо, меѓу син и мајка, а веќе во вторник тоа ќе го читав во весници или ќе го гледав на локална телевизија. Не можеше да се воздржи“, раскажува тој. „Имавме прилично досадни разговори во тие години. Не ѝ кажував речиси ништо“, додава Меконахи.

Капката што ја прелила чашата

Кулминацијата на проблемот дошла кога актерот на телевизија видел прилог во кој неговата мајка ги води новинарите низ куќата каде што тој пораснал.

„Ги водев луѓето низ куќата и им ја покажував собата каде што Метју спиеше. Толку бев горда што можам тоа да го споделам со светот“, се присетува неговата мајка Кеј.

Актерот се сеќава како реагирал на тоа:

„Ја повикав на телефон. Таа се јави, и ѝ реков: ’Мамо, што направи?‘ А таа одговара: ’Што?‘ Во заднина ја слушав истата таа емисија што штотуку ја гледав, како ги води камерите низ куќата. Таа рече: ’Аха, тоа. Мислев дека нема да дознаеш“.

По 8 години односите во семејството конечно се средиле

Со текот на времето, Меконахи станал доволно сигурен во својот статус и слава, па престанал да дозволува таквите постапки да го повредуваат. Тогаш и ѝ дозволил на мајка си целосна слобода.

„Станав доволно стабилен во мојата кариера и слава, и си реков: ’Знаеш што? Мајка ми може да зборува што сака‘“, изјави тој.

„Ајде, мајко, пушти се слободно. Прашуваше: ’Има ли некое правило?‘ ѝ реков: ’Нема никакви правила. Кажи ги сите најсочни работи што сакаш.‘ Ги кажа и беше сосема во ред. Сега ни е многу позабавно“, заклучи актерот.

Денес 93-годишната Кеј дури и се појави заедно со синот и внукот во новиот филм „The Lost Bus“, кој неодамна беше објавен.