Руските воздушни напади убија најмалку осум лица во серија напади врз Киев во текот на ноќта и повредија десетици други во најсмртоносниот ноќен напад врз украинскиот главен град во последните неколку недели.

Претседателот Володимир Зеленски, кој откри дека меѓу загинатите има и дете, рече дека нападите покажале дека Русија нема намера да преговара за крај на војната, и покрај неодамнешната интервенција на Доналд Трамп.

„Овие руски ракети и напади со беспилотни летала денес се јасен одговор за сите во светот кои со недели и месеци повикуваат на примирје и вистинска дипломатија“, напиша тој на социјалните медиуми.

„Русија ја избира балистиката пред преговарачката маса“, оцени  Зеленски

Ударни бранови можеа да се слушнат од центарот на градот по 3 часот наутро и повторно околу 5:30 часот наутро, а официјалните лица пријавија удари на повеќе од 20 локации, вклучувајќи го и уништувањето на дел од петкатна зграда на истокот од градот.

Тимур Ткаченко, началник на воената администрација на Киев, рече дека меѓу загинатите се 14-годишно девојче и друго дете. Досега се пријавени вкупно 45 повредени, додаде тој.

Три лица беа спасени од урнатините на едно од местата, рече Игор Клименко, министерот за внатрешни работи, додавајќи дека повеќе луѓе би можеле да бидат закопани под урнатините додека спасувачките екипи продолжуваат да работат.

Воздушните напади врз Киев беа релативно ретки во текот на август, кога Трамп неуспешно се обиде да ја заврши војната со средбата со рускиот претседател Владимир Путин во Алјаска, објавува Гардијан.

Нападот што се случи  изминатата  ноќ, според украинските власти покажува дека  Русија е подготвена да се врати на својата смртоносна кампања, при што украинските официјални лица известуваат дека главниот град бил цел на балистички и крстосувачки ракети, како и беспилотни летала Шахед.

Градоначалникот на Киев, Виталиј Кличко, изјави во текот на ноќта дека се случува „масовен напад врз главниот град“. Тој изјави  дека дејствуваат воздушните одбранбени сили и ги повика жителите да останат во засолништа за сопствена заштита.

#Kyev colpita duramente nella notte da droni e missili balistici

Kyev hit hard in the night by drones and ballistic missiles pic.twitter.com/hWQGhLGpf0

— War Osint 🇮🇹🇺🇦 (@spoilswar9) August 28, 2025

Украинскиот претседател Володимир Зеленски побара меѓународна реакција и повика на дополнителни санкции против Русија, вклучително и од сојузникот на Москва, Кина.

„Очекуваме реакција на Кина на она што се случува. Кина постојано повикува да не се шири војната и да се воспостави примирје“, додаде тој.

Претходно, Пекинг соопшти дека Путин ќе биде меѓу лидерите што ќе присуствуваат на воена парада со претседателот Си Џинпинг во Пекинг следната недела, што според Киев го укажува јасното сојузништво на Кина и Русија.