Уставниот суд на Република Северна Македонија го укина член 163 став 3 од Законот за банките.

Иницијативата за оценување на уставноста ја поведе Уставниот суд на седница одржана на 21 април 2021 година, според кој побарувањата на Фондот осигурување на депозити врз основа на исплати на осигурени депозити се исплаќаат пред побарувањата на останатите доверители. Судот изрази сомнеж за уставноста на оспорената законска одредба.

Здружението на оштетени физички и правни лица на Еуростандард банка „Правда за штедачи”, оцени дека Уставниот суд донел позитивна мериторна одлука.

„Ме изненадува реакцијата кај банките и не очекувавме дека банките ќе излезат со соопштение за зголемување на каматните стапки, бидејќи тие се институции кои треба да имаат поголема општествена одговорност. Затоа во текот на вчерашниот ден имаше соопштение од Народната банка дека оваа одлука не треба да се врзува со стабилноста во банкарскиот систем. Според финасиската состојба на Фондот, тој воопшто не е е во некоја критична состојба и не знам зошто се крева толку фама во јавноста дека ќе се наруши стабилноста на Фондот“, изјави во Утрински брифинг правниот застапник на оштетените штедачи во „Еуростандард банка“, адвокатот Љупчо Кузмановски.

„Вчера слушнав информации дека со укинувањето на овој член ќе се предизвика еднаквост или елиминирање на правото на депонентите до 30.000 евра што не е точно. Нивното право не е загрозено. Оваа одредба од Законот за банки воопшто не се однесува на депоненти до 30.000 евра. Оваа одредба се однесува на постапка на стечај на банка, што значи дека одредбата се применува во случај на стечај на банка. Бидејќи во „Евростандард банка“ во тек е стечајна постапка, оваа одредба ќе има влијание во понатамошниот тек на стечајната постапка. Би сакал да упатам индомација дека оштетените од „Евростандард банка“ во текот на стечајната постапка ќе бидат соочени со одлуката на Уставниот суд, односно органите кои ја водат стечајната постапка ќе мора да ја применат одлуката на Уставниот суд“, вели Кузмановски и додава дека кога одлуката ќе се објави во Службен весник, тогаш органите кои ја водат стечајната постапка ќе мора да направат внатрешна имплементација на одлуката на Уставниот суд.

Целиот разговор погледнете го во видеото: