Жена од Кина е спасена откако 54 часа била заглавена во напуштен бунар. Успешната спасувачка акција предизвика восхит во Кина, објави 163.ком.

48 -годишната жена, со презиме Ќин, била во шумска област на градот Куанџоу во покраината Фуџијан на 13 септември кога одеднаш паднала на дното на стар бунар. Поради неговата необична конструкција – тесен влез и пошироко дно – останала заробена, без начин сама да излезе.

И покрај шокот, Ќин успеала да остане жива користејќи ги своите пливачки вештини. Таа пронашла камена полица внатре и се потпрела таму, а потоа макотрпно одвоила уште три камења, создавајќи груби потпори. Така поминала повеќе од два и пол часа залепена за ѕидот, во темница, издржувајќи ги каснувањата од комарци и присуството на водни змии, од кои една дури и ја каснала без сериозни последици.

Нејзиното семејство го пријавило нејзиното исчезнување на 14 септември. Два дена подоцна, тим од десет спасувачи ги открил нејзините слаби стенкања со термална камера и на 15 септември, околу 13:45 часот, операцијата била успешно завршена, како што објави „Саут Чајна Морнинг Пост“.

Несреќната жена веднаш била однесена во болница, каде што при прегледот е утврдено дека имала две скршени ребра, лесна повреда на белите дробови и обемни рани на рацете. Лекарите проценуваат дека таа целосно ќе се опорави.