На протест против враќањето на хартиените гласачки ливчиња во Бугарија, излегоа илјадници граѓани, а пред насобраните говореа Кирил Петков од „Промените продолжуваат”, како и високи политичари од „Демократска Бугарија” и претставници на граѓански организации.

Петков најави дека пратеничката група на неговата партија в среда ќе влезе во Народното собрание, но само за да гласа за работната група предложена од нивна страна за расправа за изборните правила.

На протестот беше упатен повик и барање до бугарскиот претседател, Румен Радев, да стави вето за измените на Изборниот законик, доколку тој мине во второ гласање во Националното собрание.

Началото! pic.twitter.com/7n5QFcE7Ql

— Gytha Ogg (@tweet_some) November 18, 2022

Измените во Изборниот законик предвидуваат мешана форма на гласање со машински и хартиени гласачки ливчиња, а предлогот во прво читање го поддржаа партијата на Бојко Борисов, социјалистите на Корнелија Нинова и поранешниот премиер Стефан Јанев, како и за Движењето за права и слободи на Мустафа Карадај.

Учесниците на протестот потоа се преселија пред зградата на Бугарската национална телевизија, каде изразија револт поради вечерашното учество на пратеникот на Движењето за права и слободи, Јордан Цонев, во емисијата „Панорама”.

Протест се одржа и во Варна, пред општинската зграда.

Демонстрантите соопштија дека промените во Изборниот законик се посегнување во изборниот процес. Тие се изјаснија и против зголемувањето на составот на ЦИК, што според нив ќе доведе до поголема зависност на Комисијата од политичарите.

Според нив, враќањето на хартиените гласачки ливчиња е манипулација за следните избори. Тие побараа гласањето да не биде мешано, туку само со машински.

Протестот во Варна мина мирно, без тензии.