Пуштени се во употреба двата центри за сместување мигранти во Албанија кои ќе примаат азиланти од Италија. Патувањето на првите мигранти веќе започна по морски пат до градовите Шенѓин и Ѓадер во Албанија каде што се изградени двете структури.

Овие центри се наоѓаат во Шенѓин, 75 километри северно од главниот град Тирана и во близина на поранешниот воен аеродром во Ѓадер, а Италија ја чинат 670 милиони евра.

Додека за надворешната безбедност на камповите се задолжени албански чувари, центрите ќе бидат целосно управувани од Италија. Италијанските официјални лица, вклучувајќи полиција, лекари, психолози и друг персонал, веќе се таму.

Мигрантите, откако ќе бидат проценети во Шенѓин, оние кои имаат право на азил ќе бидат префрлени во Ѓадер, поранешна албанска воздушна база, која вклучува објекти со 880 места за баратели на азил, 144 места во притвор за репатријација и 20 места во казнено-поправен дом.

Надежта е дека до 36.000 економски мигранти годишно може да бидат обработени и вратени.

Албанската влада ќе ги разгледува само барањата за азил од земји кои Италија ги смета за „безбедни“. Оваа листа, неодамна проширена од 15 на 21 земја, меѓу другите ги вклучува Бангладеш, Египет, Брегот на Слоновата Коска и Тунис.

Во 2022 година, повеќе од 56.000 луѓе од овие земји пристигнаа во Италија. Сепак, поради означувањето на нивните земји на потекло како безбедни, се очекува мнозинството барања за азил да бидат одбиени, што ќе доведе до притвор и можно враќање. Оние кои ќе добијат азил ќе бидат однесени во Италија.

Стратегијата на владата на Мелони

Италијанската премиерка Џорџа Мелони и нејзините десничарски сојузници долго време ги повикуваат европските земји да го поделат товарот на имиграцијата, а соработката со Албанија е дел од таа стратегија. Со процесуирање на барањата за азил надвор од италијанските граници, Италија има за цел да го забрза процесот на репатријација на мигрантите.

Сепак, хуманитарните групи изразија загриженост за новиот систем, плашејќи се дека центрите брзо ќе се наполнат со луѓе кои чекаат да се вратат во своите татковини.

Критичарите велат дека планот има приоритет на враќање, ги занемарува на правата на мигрантите и ги влошува нивните животни услови.

Во меѓувреме, изненадувачки е што на првото патување на бродот „Либра“ на италијанската морнарица до двата затворени центри за баратели на азил во северна Албанија, имало само 16 имигранти, според официјалните податоци на Министерството за внатрешни работи во Рим.

Станува збор за десет Египќани и шестмина од Бангладеш, кои испловиле со бродови од Самбрата и Зуара, Либија. Бродот на италијанската морнарица се очекува утре да пристигне во Албанија. Според весникот „Ла Република“, вкупните трошоци за патувањето на бродот „Либра“ надминува 250.000 евра.

Централно-левичарската италијанска демократска партија, преку нејзиниот секретар Ели Шлајн , подвлече дека „Владата на Мелони фрла осумстотини милиони евра на италијански граѓани во договор за преместување мигранти во Албанија, кршејќи ги основните човекови права и игнорирајќи ја одлуката на Судот на правдата на ЕУ, што ја прави целата оваа зделка пукната“.

#Migranti verso l’Albania sulla nave militare Libra , con a bordo 16 persone intercettate in acque internazionali. #Bruxelles approva il protocollo #RomaTirana. Lettera di #vonderLeyen “Sviluppare hub fuori dall’#UE. @Gavinomorett pic.twitter.com/hxjVoHQLlA

— Rai Radio1 (@Radio1Rai) October 15, 2024

Сепак, претседателката на Европската комисија, Урсула фон дер Лајен , во своето писмо до европските шефови на држави и влади пред самитот на 17 и 18 октомври, подвлече дека:

„Треба да продолжиме и да ги истражуваме начините што можеме да ги следиме, во однос на развојот на центрите за репатријација надвор од ЕУ, особено во поглед на новиот предлог за закон за репатријации. Со почетокот на активностите предвидени со протоколот Италија-Албанија, ќе можеме да извлечеме практични заклучоци“.

Мелони: Се бориме против нелегалната миграција и трговијата со луѓе

Италијанската премиерка Џорџија Мелони, говорејќи во Сенатот во Рим пред Европскиот совет закажан на 17 и 18 октомври, се осврна на ставот на нејзината земја за управувањето со миграциските текови.

Италијанската премиерка нагласи дека „пристапот на Европа кон имиграцијата е променет, благодарение и на италијанскиот придонес“, и додаде дека „Италија стана пример во однос на борбата против илегалната имиграција“.

Шефицата на италијанската влада нагласи дека оваа година, во однос на 2023 година, доаѓањето на илегални имигранти е намалено за 60%, а почна да се намалува и бројот на луѓе кои ги губат животите на море.

„Единствениот начин да се спречат понатамошни трагедии на море е да се спречи пристигнувањето и да се бориме со трговците со луѓе кои дејствуваат без двоумење“, нагласи Мелони.

„Почнувајќи од утрешниот Европски совет, на иницијатива на Италија, ќе се организираат неформални средби на земјите од Унијата во кои имиграцијата има најголеми ефекти“, рече италијанската премиерка.

Конечно осврнувајќи се на отворањето на италијанските затворени центри за баратели на азил во северна Албанија, Џорџија Мелони додаде:

„Почнаа со работа двата центри во Албанија, презадоволни сме. Ова е нов, храбар пат што може да се следи со други земји кои се надвор од Европската унија. Уште еднаш благодарност до албанскиот премиер Еди Рама и целата негова влада, за верувањето во целата оваа иницијатива“.

Првите мигранти од Италија тргнаа кон албанските кампови