Група млади туристки го снимија својот разговор со таксистот откако беа шокирани од износот на сметката за возењето, кој достигнал 643 евра. Случајот предизвика бурни реакции во јавноста, а таксистот потоа ја изнесе својата страна на приказната за Далматински портал.

Според возачот, сметката не се однесувала само на километражата, туку и на трошоците за чистење на возилото.

„Цената на превозот беше 280 евра, а дополнително наплатив 350 евра за чистење на автомобилот, согласно ценовникот што е прикажан во возилото. Девојките истурија Швепс, а зад едната од нив остана локва на задното седиште, поради што морав да направам длабинско чистење. Сакав да ја повикам полицијата за да се реши ситуацијата, но не сакав да им правам непријатности на гостите во хотелот. Едно од девојчињата го повика својот татко и на крај се договоривме да платат 150 евра во готово. Тоа е целата вистина. На крај, платив 70 евра за длабинско чистење, така што практично возењето ги чинеше толку“, изјави таксистот.

Возачот дополнително објасни дека според неговиот ценовник наплатува 20 евра по километар, но тоа важи само за растојанија подолги од 30 километри. Тој истакна и дека туристките воопшто не прашале за цената пред да се качат во таксито.