Додека источниот дел на Украина е во пламен и земјата гори од сите страни, а Киев бара секаква можна помош – финансиска, воена и хуманитарна, од Европската Унија и од САД, западниот дел од земјата, особено регионите како Лвив и Карпатите, изгледа како сосема различен свет. Таму животот се одвива со друг ритам – се градат нови туристички центри, инфраструктура и се развива економијата.

Оваа контрастна слика ја истакнува поделбата во Украина, каде што војната уништува цели градови на исток, а на запад се отвораат луксузни хотели и модерни скијачки центри. Ваквата реалност отвора прашања за приоритетите на земјата во услови на тешка криза и огромен долг кон меѓународните партнери.

Основачот на групацијата „ОККО“ Виталиј Антонов и извршниот директор на групацијата Васил Даниљак најавија почеток на изградба на планински туристички центар во Карпатите со инвестиција од 1,5 милијарда долари.

Планинското одморалиште „ГОРО“ е амбициозен проект за целогодишен планински туристички центар во западниот дел на Украина, во регионот на Лавов, близу селата Волосјанка и Верхња Рожанка, на падините на венецот Високии Верх на надморска височина од 650 метри.

Планирано е одморалиштето да биде модерно, со капацитет да прима илјадници гости годишно, нудејќи врвни скијачки патеки, хотели и други содржини за туристите. Владата на Украина ја поттикнува оваа иницијатива со надеж дека ќе ја трансформира земјата во популарна дестинација за зимски спортови.

Комплексот, чија изградба се очекува да трае 15 години, ќе зафаќа површина од речиси 1.200 хектари, од кои 360 хектари ќе бидат наменети за скијачка инфраструктура, а повеќе од 800 хектари за хотели, трговски и рекреативни објекти. Во планот се изградба на 41 скијачка патека со вкупна должина од 75 километри и модерен систем за снежна покривка, како и ски-лифтови со вкупна должина од 17,5 километри. Една од гондолите ќе биде најдолга во Украина (2,8 километри), а ќе има и најдолга скијачка патека во земјата од 3,8 километри.

Првата фаза од проектот, која ќе опфаќа 127 хектари, веќе почна и вклучува 10 скијачки патеки со вкупна должина од 13 километри, два модерни лифта и пет хотелски комплекси со над 1.100 соби. Оваа фаза е предвидено да биде завршена до 2028-2029 година. Вкупната инвестиција е проценета на 1,5 милијарда долари, од кои 500 милиони ќе бидат обезбедени од групацијата „ОККО, која е главниот инвеститор и развивач на проектот. Уште 1 милијарда се очекуваат од надворешни инвеститори.

Целта е „ГОРО маунтин ризорт“ да стане водечки туристички центар во Украина и пошироко, нудејќи целогодишни активности и рекреација за туристи од Украина и странство. За реализацијата на проектот се ангажирани врвни меѓународни компании како „ПКФ хоспиталити“ и групациите „ИЛФ“ и „Допелмаер-Гаравента“.

„ОККО“ обединува повеќе од 10 различни бизниси во области како производство, енергетика, трговија, развој и градба, агросектор, енергетски решенија, услуги и други дејности. Главниот бизнис на групацијата е најголемата мрежа на бензински станици во Украина под брендот „ОККО“ со вкупно 410 објекти. Во моментот, ОККО Груп развива нови насоки, како што се производство и складирање на електрична енергија, изградба на фабрика за биоетанол и агробизнис.