Екстремен топлотен бран го зафати источниот Медитеран, оставајќи зад себе разорни последици во Турција и Грција. Во турскиот град Силопи, близу границата со Ирак и Сирија, се измерени рекордни 50,5 степени Целзиусови – највисока температура некогаш забележана во земјата, пренесува „Хуријет“.

Досегашниот рекорд изнесуваше 49,5 степени и беше забележан во август 2023 година.

Турската метеоролошка служба соопшти дека дури 132 станици во земјата измериле температурни рекорди за јули. Во некои региони, температурите се и до 12 степени над просекот за ова време од годината. Болниците бележат пораст на случаи на дехидрација, топлотен удар и труење со храна.

Високите температури, силните ветрови и сувото земјиште создадоа идеални услови за појава на пожари низ целата земја. На југот, во Анталија, огнот се приближи до станбени згради, што доведе до евакуации во центарот на градот и во округот Аксу. Во петокот во Анталија беа измерени 46,1 степен – највисока јулска температура во овој град од 1930 година.

Turkey is battling a wave of unprecedented forest fires triggered by extreme heat, with blazes erupting across parts of eastern Antalya and spreading dangerously into residential zones in Bursa. pic.twitter.com/TJ8M6dReoK

— OMO BLOG.ng (@Omoblog_) July 28, 2025

Пожари се пријавени и во провинциите Карабик, Сакарија и Билечик на северот, каде се евакуирани повеќе села. Во провинцијата Ескишехир 13 луѓе загинаа борејќи се со огновите.

Во провинцијата Бурса на запад, пожарите опасно се приближија до населени места. Евакуирани се повеќе од 1.700 луѓе, како и едно засолниште за животни. Во гаснењето се вклучија и локални земјоделци, носејќи вода со трактори.

Во Карабик, пожарникарите четврти ден по ред се борат со огнот. Евакуирани се 18 села, а причината за пожарот сѐ уште не е позната. Гасење од воздух не е возможно во текот на ноќта поради безбедносни причини. Министерството за шумарство соопшти дека наутро биле ангажирани три авиони и три хеликоптери, а вкупно над 1.000 луѓе се на терен.

Претседателот Реџеп Таип Ердоган изјави дека „Турција се соочува со вистинска катастрофа“ и наведе дека со пожарите се борат 25.000 луѓе, со поддршка од 27 авиони, 105 хеликоптери и 6.000 возила.

Поради недостиг на вода, локалните власти воведоа ограничувања во потрошувачката во повеќе места, вклучувајќи го и популарното летувалиште Чешме на западниот брег.