Универзитетскиот професор Оливер Андонов смета дека на Русија во овој момент од војната во Украина и треба ново воено и политичко жариште во „мекиот стомак” на Европа, а тоа е Балканот. Случувањата на Косово се очигледен доказ за тоа, но и Македонија не е поштедена од специјалната војна преку т.н. хибридни напади.

Оливер Андонов кој себеси се смета за фракција во ВМРО-ДПМНЕ смета дека раководството на партијата прави стратешки грешки со блокирање на уставните измени и верува дека во пратеничката група има доблесни партиски членови кои ќе смогнат храброст да гласаат за уставните измени но дека најдобро за партијата е ако сите нејзини пратеници гласаат за.

Андонов го прозва лидерот на ВМРО – ДПМНЕ дека на други места, во средби со меѓународни претставници ветува дека тој ќе ги направи уставните промени.

-Власта е за паѓање, не е дека ние треба да ја чуваме оваа власт, но прашањето е каква опозиција ќе дојде. Нека ми одговори Мицкоски дали ќе ја продолжи истата политика ако дојде на власт? Дали се неточни информациите кои доаѓаат дека во меѓународните релации кои колку-толку ги има некаде, ветува дека ако дојде на власт тој ќе ги направи промените во Уставот. Како ќе ги направи? Со преговори со Бугарија? Со кого? Со Бојко ќе преговара? Па Бојко ја направи оваа состојба заради подигање на сопствениот политички рејтинг во Бугарија пред изборите, рече Андонов во емисијата „Утрински печат“.

Тој обвини дека Мицкоски досега не донел ниту една политичка одлука која е државотворно стабилна.

-Во НАТО кога требаше да влеземе се водеше погрешна постапка, Европска унија доаѓа – погрешна, попис – погрешна политика. Кажете ми еден успех на ВМРО-ДПМНЕ. Всушност јас знам што ќе каже. Локалните избори? ВМРО-ДПМНЕ доби 45 општини, тоа е апсолутна победа, но со колку гласа. Толку минимален број на гласови ВМРО-ДПМНЕ никогаш немало на едни избори, со ваква никава власт и со Заев. Тука е клучот. Граѓаните решија да му дадат простор на ВМРО-ДПМНЕ намерно поради Заев, не поради ВМРО-ДПМНЕ, нагласи проф. Андонов.