„Слободен печат“ во поддршка на верските заедници во Македонија. Без разлика дали верувате во себе или во Господ, Алах, синот и светиот дух, се водите по Куранот, Библијата или Светото писмо, на крајот сте сепак човек што е дел од една заедница. Православен, муслиман, скиентолог, бектеш, дервиш, евангелист, католик или јудеист. Сите заедно треба да градат соживот и да се разбираат и да се прифатат меѓу себе.
„Слободен печат“ ќе се обиде преку запознавање на религиите да одговори на прашања кој како го слави Господ, кој што празнува, во што верува, како ја следи верата. Целта е да се запознаеме себеси, но и соседот, пријателот, познајникот кој е припадник на друга верска заедница или црква. Преку серијал од десетина епизоди се надеваме дека ќе придонесеме подобро да се запознаеме меѓу себе и да сфатиме на крајот дека сите сме исти.

Бобан Митевски е отец во црквата „Свети Никола“ во населбата Аеродром. За православната вера вели дека е откриена, богодадена, откровенска, откриена од бога. Во семејството по мајчина страна имал повеќе свештенции, подалечни роднини. Свештеник станал случајно, не му одела математика, па по разговор со родителите се запишал на Богословија.

-Ние веруваме во едне бог со три лица Отецот, Синот и Светиот дух и тој троичен бог кој преку својот син ни го откри верувањето. Јас сум свештеник и православната црква има царско свештенство, а во рамки на тоа има функционално свештенство и на крај е верниот народ. Јас сум оној кој ја пренесува заедничката жртва од сите и за се. Нашата вера се разликува од другите по начинот на верување. Тоа се догми, вистини на верата- вели Митевски.

Најусштестевен сегмент во православието е Светата литургија, тоа е служба на заедница, и тука сите стануваат едно тело и еден дух.

-Од Светата литургија поизлегуваат сите обреди и тајни. Литургијата е централна служба. Откако ќе се роди детето, тука е крштението односно воведување на детето во православната вера и со тој чин детето станува член на Православната црква. Потоа следи Света тајна- брак која подразбира венчавање на две лица маж и жена кои сакаат да почнат заеднички живот и стануваат едно- вели Митевски.

Околу соработката со другите верски заедници отецот вели дека тоа е нормално да се прави и е многу важно бидејќи нема држава со една религија или една вера. Сите религии и сите вери треба да знаат да комуницираат меѓу себе за добро пред се, на општеството.

– Би рекол сите верски заедници треба да бидат на таа една висина на задачата во која што ќе ги учат и ќе ги поттикнуваат своите верници на добро, и на заеднички соживот, со сите кои се поразлични од нив. На крајот на краиштата како секојдневие делат заеднички интереси и заеднички потреби- вели Митевски.

Во православието има литургија, света причест, пост, односно четири големи постови во текот на годината.

-Кога ние се лишуваме од храна од животинско потекло, нашата исхрана е само растителна во тој период додека трае постот. Постот може да биде повеќедневен- вели отецот.

Има четири повеќедневни постови во годината, пред празникот Божиќ, пред празникот Велигден, пред празникот на Светите апостоли Петар и Павле и пред празникот на успение на Св. Богородица.

-Верниците нема ништо задолжително што мора да го прават. Тие треба да прават она што го чувствуваат. На верата и се пристапува по слободна волја.Треба да учествуваат на литургиите, на празниците  да ги примаат сите тајни, односно причест. Кај нас постои исповест, помазување, не постои заедничко прочистување, молитвата е храна со душата која е дијалог со бога- вели Митевски.

Целото интервју на колешката Агнеса Чаволи погледнете го во продолжение: