Со почетокот на украинската долгонајавувана контраофанзива информациите од теренот говорат дека и едната и другата страна генерално гледано имаат големи загуби, што во техника, што во луѓе. Но она што може да се забележи од првите неколку дена на воената офанзива каде што имаше многу не очекувани грешки на украинските сили на отпорот, сега состојбата полека се менува, односно има поголема синхронизацијата на артилериските системи и маневарот со оклопните возила со што се задава сериозен удар на силите кои се поставени на првата линија од страна на Русите. Што се однесува на тоа дали 70.000 украински војници ќе можат да направат вистински удар, не сум многу убеден. За покривање на ударната линија на фронтот која се протега во должина од околу 800 км. потребни се најмалку дупло повеќе од сегашната воена сила, односно околу 150.000 Украинци – вели универзитетскиот професор Методи Хаџи Јанев при неговото гостување во Утрински печат.

– Руската одбрана е делумно обемна и ударна во и околу линијата на украинскиот удар околу Бахмут. Истата е флексибилна што значи дека има маневрабилна способност на исчекорување и тоа може да создаде илузија дека всушност вие сте ја пробиле а во реалноста тоа да не значи дека истата е падната, односно да им се случи опкружување на украинските сили – посочи Хаџи Јанев и дополнува дека Украина досега покажа дека брзо учи од своите грешки на воените полиња.

Професорот Хаџи Јанев во разговорот во студиото се осврна и на последните состојби во северно Косово.

– Во повеќе наврати говорев дека ова е едно од можните сценарија во кое и едниот и другиот лидер ќе се обидуваат да го растегнуваат балонот со трпение на меѓународната заедница а со цел да се добијат политички поени дома. Ваквите игри и интриги пак во исто време можат да завршат многу брзо и многу кобно по двајцата и Албин Курти и Александар Вучиќ. Историски гледано сите лидери на Балканот кога преговарале од нивната почетна позиција на крајот тие секогаш завршувале на полоша позиција од почетната. Ваквото сценарио многуверојатно ќе се случи и овој пат доколку двајцата лидери продолжат со ваквите интриги и недоветни игри. Факт е дека некој ќе биде виновен, но и факт е дека во оваа игра и двете страни нема да бидат победници. Играњето по линија на огнот е опасно во секој случај а особено кога имаме војна во Украина – истакна Хаџи Јанев.

Повеќе од разговорот со професорот Хаџи Јанев можете да погледнете во видеото во продолжение.