Има ли Македонија генијалци и иноватори? Што креираат генијалците и по што се издвојуваат од своите врсници? Колку иновации има во државава и колку се иновативни нашите поединци, а на колку се работи? Прашања на кои малкумина го знаат одговорот. „Слободен печат“ ќе се обиде преку серијал да обезбеди барем мал дел од одговорите и да им даде шанса на генијалците и на иноваторите да ѝ ги претстават своите креации и идеи на пошироката јавност. Креатори на игри, успешни шахисти, инженери, научници, балерини… се само дел од ликовите што ќе бидат дел од нашиот серијал. Се надеваме дека на ваков начин ќе ја поттикнеме јавната свест но и надлежните институции да се издвојуваат повеќе средства за оваа намена, да најдат начин да ги промовираат нивните идеи онаму каде што треба за подобро утре за сите нас. Воедно, ова нека биде и отворен повик до сите што сакаат да ги споделат своите успеси и иновации со нас, но и со целата јавност, да се пријават на официјалната имејл-адреса.

Единаесетгодишниот Павел Крстевски од Скопје тренира шах веќе пет години и е дел од Македонската шаховска репрезентација. Има освоено над 30 медали и пехари кои ги добил во земјава, но и надвор од неа. Наместо играчки, тие стојат како украс во неговата соба. За „Слободен печат“ вели дека
одвојува два часа од денот за да тренира и анализира шаховски игри.

-Јас се заљубив во шахот благодарение на татко ми. Ме однесе еднаш во шаховскиот клуб „Гамбит“ и кога заврши првиот час, оттогаш сум вљубен во шахот- вели Крстевски.

Негов шаховски идол е младиот велемајстор Рамешбабу Прагнананда. Тој е инспирација и мотивација младиот Павел да игра шах.

-Играњето шах со постари е предизвик за мене бидејќи има поголеми шанси за победа играјќи со добри тактики- вели Павел.

Еден од неговите најзначајни турнири е победата на првенството на Скопје. Бил на натпревари во Грција и Романија. Идни планови му се да стане познат шахист и да игра низ цела Европа, низ Норвешка, Холандија, но и пошироко низ светот. Павел ги бодри сите кои го негуваат шахот да посветуваат повеќе време на вежбање и да се запишат во шаховски клуб.

Целото интервју на колешката Агнеса Чаволи погледнете го во продолжение: