Платформата за родова еднаквост по одржаната прес-конференција пред Министерството за внатрешни работи (МВР) не се откажува од своите барања – симболично до 8 март сите сторители, а не само оние што се осомничени за детска порнографија, да одговараат за своите криминални дела.

– По протестот за расчистување на случајот „Јавна соба“, Министерството за внатрешни работи ни изрази поддршка со едно соопштение, медиумите го пренесоа и на тоа се’ заврши. Но, нашите барања се конкретни и нема да се задоволиме само со декларативна поддршка. Не сме задоволни од начинот како постапи полицијата. Сакаме примена на законите, сакаме во практика да видиме заштитени жени и сторители на родово засновано насилство, криминалци во затвори со ефективни казни, согласно законите и Истанбулската конвенција, која што не е доволно само да се ратификува туку треба и да се спроведе. Досега се гонат сторители на кривичното дело – производство и дистрибуција на детска порнографија, вели Драгана Дрндаревска од Коалицијата „Маргини“, членка на Платформата за родова еднаквост, во „Утрински брифинг“.

– Такашто овој однос на полицијата го имаме утврдено и од претходно, во многу повеќе случаи. Клучно е полицијата да постапува. Да видиме насилник ставен зад решетки и жртва која е заштитена низ целиот систем. Тоа е единствениот начин со којшто жртвите ќе добијат доверба во системот. Но, исто така и професионалниот однос од страна на полицијата, каде има непотизам и се случува сторителот да фати врски и да биде заштитен тој а не жртвата, додава Дрндаревска.

Целиот разговор со Драгана Дрндаревска од Коалиција „Маргини“ можете да го погледнете во видеото: