Стотици граѓани денеска дојдоа во „Холидеј ин“ на отворениот ден за работа што го организираше Групацијата „Јадрански луксузни хотели“ од Хрватска. Меѓу присутните имаше и млади и повозрасни, а нивната заедничка порака беше дека сакаат да заработат повеќе отколку што би заработиле во државава.

Но, според изјавите што ги добивме, не се само парите причина за нивната желба да одат во една земја членка на ЕУ и таму да работат. Тие сакаат и да работат во поорганизирана средина, да поуживаат во климата и во морето, а дел од нив имаат и поголеми амбиции – ако може да се преселат во Хрватска.

Никица Стражичиќ, претставник за вработување и едукација, истакна дека интересот на македонските граѓани за работа во Хрватска постојано расте.

– Задоволни сме од интересот на македонските граѓани за работа во Хрватска. Ние соработуваме со вашите граѓани од 2017 година, а денес можам да кажам дека од година во година расте бројката на работници што се одлучуваат да дојдат во нашата земја. Задоволството на работниците е очигледно, бидејќи тие самите нè препорачуваат на своите роднини и пријатели – вели Стражичиќ.

Стражичиќ дополнително ги претстави и условите што ги нуди Групацијата на „Јадрански луксузни хотели“.

– Денес на присутните им понудивме шест месеци сезонска работа во Хрватска, во хотели со 5 ѕвезди во Дубровник и во околината. Покрај ова, им нудиме бесплатно сместување, обезбеден оброк и платени патни трошоци од Македонија до Хрватска и назад, платите се конкурентни за нашиот туристички сектор … Туризмот во Хрватска бележи раст и развој секоја година, па затоа и имаме потреба од дополнителен кадар. Факт е дека поголем дел од хрватскиот народ заминува од својата матична земја, но по некое време повторно се враќаат назад. Интерес за работа покрај од Македонија, има и од граѓаните на Србија и на БиХ, дополни таа.

Работодавачот прати и порака до нашите граѓани, потенцирајќи дека „сѐ што се бара од кандидатите е волја за работа на Јадранското крајбрежје“.

– Јас посакувам граѓаните на Македонија да најдат работа во својата држава. Сепак, доколку не успеат во тоа, а притоа сакаат нова авантура во својот живот, тогаш нека ја имаат предвид Хрватска, место во кое покрај работата, ќе имаат можност да прошетаат, но и да уживаат на убавото море и плажи, потенцираше Стражичиќ.

Некои од присутните беа фокусирани на презентациите, а другите не чекаа долго, па веднаш ги пополнуваа апликациите за работен ангажман.

„Слободен печат“ разговараше со некои од нашите граѓани што ги затекнавме на отворениот ден за работа во Хрватска.

– Корупцијата е прва причина поради која сакам да излезам од нашата држава, а овде се и политичките прогони. На денешната презентација видов убави понуди и услови за да се отиде на работа во Хрватска – изјави повозрасен граѓанин.

За една помлада девојка, пак, главна причина за сезонската работа е платата.

– Овде е катастрофа, не сме задоволни од платите во Македонија, затоа и дојдов да ги разгледам понудите во Хрватска – ни рече таа.

Истовремено, додека хрватските компании бараат работници од Македонија, македонските газди, пак, велат дека не можат да најдат работна сила дома и бараат олеснување на престој и работа на странски државјани во нашата земја.