Викендов екипата на „Слободен печат“ беше на василичарската прослава во тиквешкото село Бегниште.

Жителите на ова село ја чуваат и почитуваат традицијата на маскирање онака како што ја наследиле од нивните претци. Со зацрнети лица и со клопотарци и ѕвонци на појасот џоломарите низ ритуална впечатлива игра ги растеруваат злите духови и нудат благослов за здравје и бериќет во идната година. Џоломарската група брои 15-тина членови, кои главно претставуваат подгрбавени и белобради старци со бастуми, а имаат и две невести и една стара баба која ја симболизира старата година која си заминува според Јулијанскиот календар на Василица.

Играта вклучува и шеговито полово општење со невестите за плодност и бериќет. Се маскираат само мажи, дури и за улогата на невести во бело и бабата во црна облека. Ѕвонците и клопотарците кои Џоломарите ги носат на појасот и чии звуци ечат низ селото во текот на 24 часовното празнување тежат и по 15 килограми.

Групата ја предводи магаричар кој го води магарето на чело на џоломарската група која оди низ селото и коледа од селаните разни продукти и пари.

Вечерта пред Василица се маскираат и децата, а рано утрото од пред изгрејсонце Џоломарите ги црнат лицата од саѓите од фурните и се подготвуваат да излезат  средсело, од каде го обиколуваат целото село давајќи благослов на селаните.

Овие пагански обичаи во Бегниште се негуваат со векови, не се знае кога почнале да се применуваат но помладите генерации се обидуваат да го зачуваат изворниот василичарски обичај.

Од 2019 година со одлука на Министерството за култура овие обичаи во Бегниште се прогласени за нематеријално културно наследство од големо значење.

Како изгледаат Џоломарите и обичаите, погледнете во прилогот: