Кина, Јапонија, Казахстан, Словенија, Словачка, Австрија, Шпанија, Бугарија, Чешка, Хрватска, Косово, Италија, Литванија, Швајцарија преку своите амбасади оваа година беа дел од Дипломатскиот добротворен базар во организацијата на ,, Добредојде Македонија – Welcome centre“.

Настанот се одржува по повод Светскиот ден на детето под почесно претседателство на г-дин Грегор Прескер, амбасадор на Република Словенија.

– Многу сум задоволен што се собравме  тука на овој хуманитарен настан.  Денеска го славиме Денот на детето и кој би бил најдобар начин ако не преку солидарност и меѓусебното пријателство да ја покажеме хуманоста – рече Прескер.

,,Слободен печат” беше во посета на овој традиционален настан на кој секоја земја се претстави со свој штанд каде што посетителите имаа можност да вкусат од традиционалната кујна и да купат сувенир. 

Собраните средства годинава се наменети за поддршка за ранливи деца и заедници за училиштата „Св. Климент Охридски“ (Македонски Брод) и „Братство-Миѓени“ (Тетово).

– Сега кога се ближи Божиќ важно е да се покаже дека дипломатскиот кор е вклучен и во социјални иницијативи во вашата земја, па затоа сум многу среќен што нашата амбасада учествува на овој значаен добротворен базар – изјави за ,,Слободен печат” шпанскиот амбасадор, Рафаел Соријано Орриз.