Некогашниот директор на Царинската управа, Драган Даравелски, кој беше осуден за злоупотреби пред дваесет години, а неодамна се врати во Македонија од Србија, каде беше во бегство, денеска беше пуштен од затворот „Идризово“ по 35 дена, а камерата на „Телма“ го забележа моментот и првата снимка на Даравелски пред македонската јавност по две децении.

Даравелски не застана и не одговори на прашањата на новинарот. Влезе во еден од двата автомобила со затемнети стакла кои го чекаа и замина во правец на Куманово.

Ексдиректорот на Царината, кој на оваа позиција беше во времето на владеењето на ВМРО-ДПМНЕ и Љубчо Георгиевски, требаше да одлежи седум години затвор според правосилна пресуда, но откако успеа да бега цели дваесет години, сега очекува ново судење на кое најверојатно ќе биде ослободен поради застареност на делото.