99 % од казината и спортските обложувалници во Тетово ќе се затворат ако се изгласа законот за игри на среќа, велат од Движењето Антикоцкање. Оттаму се надеваат дека до крај на годината законот ќе помине во Собранието.

„Ние цело време се обидуваме да ги затвориме обложувалниците и казината, но од друга страна постојано се отвораат нови. Нови фирми доаѓаат тука, кој им дозволува тука да се отвораат нови? Затоа бараме државата да реагира. Не е точно дека ако се затворат спортските обложувалници и казина илјадници луѓе ќе останат без работа. Ние кога сме почнале со нашите активности биле вработени 1000 луѓе во овие објекти, сега има околу 10 000 луѓе вработени, утре ќе има и над 50 000 луѓе вработени. Ако се затворат, ниеден човек нема да остане без работа, тоа е ветување и од премиерот и од лидерите на партиите. Ниту сивата економија ќе порасне оти ние мислиме дека законот треба да функционира“, вели Јуши Емурлаи од движењето Антикоцкање.

Коцката како порок носи и други пороци, велат од Антикоцкање. Таму се врши и проституција, се дели дрога, обвинуваат од движењето.

„Тука во казината има проституција, дрога, лихвари, затоа не треба да имам казина и спортски обложувалници. Во Косово на пример се донесе одлука во наредните 10 години да не се отвори ниту една обложувалница, во Албанија може да се отвораат само спортски обложувалници и не може да отвора кој сака обложувалница. Казина на пример можат да се отвораат во хотели со 5 ѕвезди и тие казина да бидат само за странци и Грција и Турција ги затвораат, значи ние Македонија сме станале едно големо казино, затоа бараме чаре од власта да се реши проблемот“, вели Емурлаи.

Новиот Предлог закон за игри на среќа предвидува спортските обложуваници и казина да бидат оддалечени најмалку 500 метри од училиштата. Истиот е поминат во собраниски комисии, но неговото изгласување во Собранието се одолговлекува.

„Проблемот зошто не се изгласува Предлог законот за игри на среќа е во самата Влада, односно Парламентот. Најголемата пречка е ВМРО – ДПМНЕ ,зошто не се согласуваат со новиот закон. Ние како движење се занимаваме 7 години со оваа работа и немаме помрднување ни сантиметар. Прв пат се донесува законот не е сјаен, но од некаде се почнува. Значи од некаде да се почне, а ВМРО – ДПМНЕ, продолжува да го кочи овој закон.На комисиите е поминат овој закон, сега во Парламентот треба да се гласа, но нема кворум, а овој закон нема шанси да остане по Нова Година оти има избори. Мора да се почне од негде, овој закон не е наше барања, нашето барање е да се затворат сите казина и спортски обложувалници. Но тука нема таква војла од сите страни и позиција и опозиција немаат таква волја, но од некаде мора да се почне“, вели Емурлаи.

Ако овој закон не помине најавуваме големи протести ширум државава, најавија од Движењето Антикоцкање за „Слободен печат“.