Македонскиот атлетичар Андреас Трајковски имаше солиден настап на меѓународниот атлетски митинг што денеска се одржа во Калитеа, Грција, каде што се пласира на седмото место во дисциплината скок во далечина.

Трајковски оствари скок од 7.70 метри, што воедно претставува негов најдобар резултат сезонава и охрабрување во пресрет на наредните натпревари. Иако не успеа да се вмеша во битката за медалите, настапот му донесе значајни бодови во континенталниот ранг.

Најдобар на митингот беше Јужноафриканецот Чесвил Џонсон со скок од 7.99 метри, а многу блиску зад него заврши Французинот Џулс Помери со само еден сантиметар помал резултат (7.98 м). Подиумот го комплетираше Иваи Ефреимов од Израел со скок од 7.92 метри.

Атлетскиот митинг во Калитеа е дел од Континенталната серија на Светската атлетика со бронзен статус, што го прави значајна проверка за атлетите во подготовките за летните шампионати и олимписките квалификации.

Следната станица за Трајковски е веќе за неколку дена кога в петок ќе настапи на нов митинг во Каламата, каде што ќе има уште една шанса за подобрување на резултатот и за пробив на ранг-листите.