Откако вчера ги одби ЕУ, Приштина утринава сепак за дополнителни 48 часа ги одложи плановите за казнување на српските возачи, кои одбиваат да се откажат од табличките издадени од Србија. Пролонгирањето на спроведувањето на одлуката премиерот Албин Курти ја донесе по барањето на Вашингтон за одложување на потегот кој може да предизвика етничко насилство. За одложувањето на одлуката Курти ја извести јавноста преку Твитер во раните утрински часови.

Оваа одлука за момент ги намали големите тензии кои вчера се зголемија откако и по неколку часовните преговори на српскиот претседател Александар Вучиќ и косовскиот премиер Албин Курти, тие не успеаја да се договорат и да ги надминат овие несогласувања. Имено, Курти одбиваше да ја суспендира одлуката за спроведување на санкции за сите кои не ги смениле регистерските таблички, отфрлајќи ги практично и барањата на Брисел. И самиот главен преговарач и преставник на ЕУ Жозеп Борел во јавноста излезе крајно револтиран од непопуштањето од тврдите позиции на Курти.

Самиот Курти пак остана на ставот дека првин Србија мора да ја признае косовската независност па потоа да започне било какви преговори и обврски кон Белград. Од друга страна и ЕУ и Белград негодуваат за однесувањето на владата во Приштина која со постигнатиот Бриселски договор се обврза да формира Заедница на Српски општини, нешто што самиот Курти целосно го отфрла.

Овие нивни несогласувања вчера го турнаа Косово но и регионот во целосна неизвесност за тоа како ќе реагираат косовските Срби при првата изречена казна за несменти регистерски таблички. Српскиот претседател Александар Вучиќ синоќа се обрати до јавноста апелирајќи кон граѓаните од српска националност да не потпаѓаат под провокации, притоа не кажувајќи какви провокации би можеле да се очекуваат.

Останува да се види што во следните 48 часа ќе биде постигнато како договор за овој проблем, кој доколку не се надмине, може да ескалира во четврток кога и официјално завршува најновата одлука за суспендирање на мораториумот за спорведување на одлуката на косовската влада околу регистерските таблици.

Она што засега е познато во јавноста е дека преставници на ЕУ и на САД заедно со српски и косовски преставници ќе се обидат да изнајадат заеднички компромис за овој проблем.

Она што се покажа е дека Приштина и самиот косовски премиер Курти засега не отстапуваат од спроведувањето на одлуката, а особено се покажа дека Курти воопшто не ги зема во предвид барањата на ЕУ, и дека Брисел речиси нема никаков авторитет врз актуелната влада во Приштина. По кој знае кој пат се покажа и дека и Косово, но и Балканот воопшто не можат да постигнат никаков договор без да се вмеша моќната американска дипломатија.

Инаку, спорот околу регистарските таблички веќе речиси две години создава тензии меѓу Србија и Косово, на чиј север живеат Срби кои ги поддржува Белград. Околу 50.000 етнички Срби кои живеат таму одбиваат да ја признаат независноста на Косово и се сметаат за дел од Србија.

Белград повеќе пати порача дека никогаш нема да ја признае независноста на како што ја сметаат јужната покраина.

Стотици полицајци, судии и други државни службеници од редовите на српското малцинство дадоа откази претходно месецов. Приштина бара локалните Срби да ги заменат регистарските таблички кои ги издава Србија со таблички РКС.