Хрватската компанија „Верне“, која неодамна го претстави својот иновативен екосистем на урбана автономна мобилност, почнува да гради објект што досега не бил виден во Хрватска. Во рамките на новиот деловен парк од осум хектари во Лучко – ВГП Парк Загреб, на 28.500 метри квадратни ќе има фабрика за големо производство на автономни електрични возила.

Производниот погон за „Верне“ ќе го гради белгиската компанија ВГП, за која ова е прва инвестиција во Хрватска. ВГП е европски снабдувач на висококвалитетни недвижнини во логистика и лесна индустрија, пишува Пословни дневник.

Во Хрватска ќе се произведуваат возила за сите пазари, со што земјата ќе добие клучна улога во модерната автомобилска индустрија. На самиот почеток ќе се произведуваат неколку стотици возила, а потоа фабриката ќе може да произведува и до 10.000 возила годишно. Обемот на производство ќе се зголемува со текот на времето, следејќи ја динамиката на проектот.

„Изградбата на овој производствен погон за големо производство претставува клучен чекор за нашиот проект, но и за целата држава. Ќе отвориме бројни висококвалитетни работни места и на тој начин ќе ја привлечеме и задржиме работната сила во Хрватска“, истакнува Марко Пејковиќ, извршен директор на „Верне“.

Градежните работи се очекува да започнат кон крајот на летово. Фабриката ќе биде завршена и опремена во текот на 2025 година, а ќе започне со работа на почетокот на 2026 година.