Велика Британија воведе санкции за црногорските кланови и шверцери на луѓе
Велика Британија воведе санкции врз клановите Скаљар и Кавак, како и врз голем број членови на тие црногорски криминални групи, како и врз лица за кои се тврди дека помагаат или соработуваат со криминални организации од други области, соопшти Амбасадата на Велика Британија во Подгорица.
Препорачано
Како што пренесува Н1 телеивизија, Велика Британија воведува санкции врз 25 клучни поединци и субјекти од мрежи за шверц на луѓе кои поттикнуваат нерегуларна миграција во Велика Британија.
„Санкциите стапуваат на сила веднаш. Ова е нов, прв од ваков вид во светот, режим на санкции насочен кон нерегуларната миграција и организираниот имиграциски криминал. Оваа акција претставува најнов чекор во кампањата на британската влада за заштита на своите граници и намалување на нерегуларната миграција“, се вели во соопштението на амбасадата.
Северноафриканските банди кои работат на Балканот, како и криминалците кои го водат шверцот на луѓе поврзани со Ирак, исто така се под санкции.
„Санкциите се насочени кон поединци и субјекти вклучени во шверц на луѓе и поттикнување на нерегуларна миграција во Велика Британија – од добавувачи на бродови во Азија, преку неформални трансфери на пари на Блискиот Исток, до водачи на криминални групи од Балканот и Северна Африка“, се вели во соопштението.
Се истакнува дека санкциите можат да го нарушат протокот на пари и опрема – вклучително и замрзнување на средства, банкарски сметки и други средства – што им овозможуваат на групите на организиран криминал да работат.
Во соопштението се вели и дека денешните чекори се првите што се преземаат според новиот Глобален режим на санкции за нерегуларна миграција на Велика Британија.
„Воведени се санкции и против кинеска компанија која рекламираше чамци на интернет платформата наменети специјално за шверц на луѓе. Тие чамци се истите што ги користат криминалните групи за транспорт на мигранти преку Ла Манш, честопати со голем ризик“, соопшти британската амбасада.
На сите оние на кои денес им е наметната санкција се јавно именувани и им е забрането да работат со британскиот финансиски систем, што ги отежнува нивните постапки.
