Велика Британија ќе ги укине дополнителните гранични проверки за живи животни пред спроведувањето на договорот склучен со Европската Унија во мај оваа година за олеснување на трговијата, објави Ројтерс, повикувајќи се на британската влада. Агенцијата забележува дека целта е да се намалат тензиите со ЕУ. Дополнителните гранични проверки на некои животински и растителни производи испорачани од Република Ирска исто така ќе бидат укинати.

Спогодбата, дел од поширокото повторно воспоставување на врските меѓу Велика Британија и ЕУ, ќе ја намали документацијата и рутинските гранични проверки на растителните и животинските производи, а воедно ќе ги одржи високите стандарди за безбедност на храната. Сепак, договорот сè уште не е спроведен бидејќи деталите сè уште не се договорени. Во меѓувреме, британските трговци мора да продолжат да ги почитуваат условите на Граничниот таргетиран оперативен модел, кој ја штити биолошката безбедност на земјата, вклучувајќи ги и постојните проверки.

Најавата дека дополнителните гранични проверки на живи животни се укинуваат дојде откако проверките на овошјето и зеленчукот од ЕУ беа суспендирани во јуни. Портпаролот на Министерството за животна средина, храна и рурален развој на Велика Британија изјави дека не може да предвиди кога договорот ќе стапи на сила. Кога Велика Британија го напушти единствениот европски пазар во 2021 година, ЕУ веднаш започна со спроведување на гранични контроли, што доведе до доцнења во пристаништата, пренесува БТА.