
Вечерва продолжуваат преговорите за минимална плата, ССМ не прифаќа ништо под 18.000 денари
Вечерва, во 19 часот, во Владата продолжуваат преговорите меѓу трите социјални партнери – Синдикатот, Организацијата на работодавачи и Владата.
Препорачано
Од страна на Владата пристигнуваат сигнали дека ќе се одговори на барањата за зголемување на минималната плата.
Денеска министерката за труд и социјална политика, Јованка Тренчевска изјави дека е уверена оти на денешното продолжување на социјалниот дијалог на Економско – социјалниот совет ќе се донесе најсоодветното решение, кое ќе биде прифатено од сите социјални партнери.
– За нас како Влада подобрувањето на економскиот статус на работниците е врвен приоритет и минималната плата ќе биде зголемена- рече Тренчевска.
Премиерот Димитар Ковачевски најави дека денеска ќе присуствува на Економско-социјалниот совет на кој, како што рече, се надева дека заедно со работодавачите и синдикатите ќе изнајдат решение кое биде на задоволство на вработените.
– Во неколку наврати имам кажано дека сум на страната на вработените. Тоа јасно го кажав и при изгласувањето на законското решение за недела неработен ден бидејќи во еден дел работодавачите имаа поднесено иницијатива за оценка на уставноста на тоа законско решение. Тогаш јасно кажав дека сум на страната на вработените. Секој вработен има право недела да ја помине со своето семејство и тоа јасно го кажав на состанокот со Стопанската комора и се договоривме низ разговор, кој ќе трае 30 дена, да се најде решение кое ќе биде бенефит за работниците и таа иницијатива да биде повлечена од Уставниот суд. Денес имаме 92 проценти од вработените на кои недела им е неработен ден, истакна Ковачевски.
Одговарајќи на новинарски прашања при денешната посета на Штип, Ковачевски не сакаше да калкулира со бројки за минималната плата, бидејќи, како што рече, никогаш не соопштува бројки кои не се базираат на анализа и кои не се договорено меѓу социјалните партнери.
– Местото каде тоа треба да биде кажано е ЕСС и таму треба да биде кажано и договорено од страна на сите социјални партнери. Во ЕСС имаме претставници на работниците кои заслужуваат да им се вредува трудот, но тука се и работодавачите чие мислење треба да се слушне бидејќи минималната плата секогаш е поврзана со зголемувањето на продуктивноста на трудот, изјави Ковачевски, додавајќи дека негов личен став е дека платите треба да растат.
Од Сојузот на синдикати остануват на ставот дека не прифаќаат ништо под 18.000 денари.
„Доколку и понатаму нема решение за минимална плата од 18.000 денари и скалесто зголемување на останатите плати, ССМ во четврток, на 10.02.2022 година, ќе излезе пред Собранието на Македонија и ќе го повика членството да им дадеме подршка на сите пратеници да го изгласаат предлог законското решение за минмималната плата предложено од ССМ, кое е доставено до сите нив и кое е 7-ма точка на дневниот ред на седницата што ке се одржи во четврток на 10.02.2022 година во 11 часот. Доколку и тоа не се изгласа, почнуваме со штрајк – блокади на фабрики, слободни економски зони, институции, патишта и итн., зошто виновни што немаме минимална плата од 18.000 денари и скалесто зголемување на сите останати плати се работодавачите, а на Владата и порачуваме одлучно да застане на страната на работниците и да го стави предлогот на ССМ на гласање на Економско-социјалниот совет и истиот да го поддржи!“, соопштија од ССМ.