Градот Вашингтон поднесе тужба против претседателот Доналд Трамп и против војската поради распоредувањето на Националната гарда во главниот град на САД, објави Ен-би-си њуз.

Во тужбата се наведува дека Трамп „грубо погазил еден од основните принципи на американската демократија — дека војската не смее да биде вклучена во спроведување на законот на домашно тло“.

Тужбата следи по одлуката на федерален судија во Калифорнија оваа недела, кој утврди дека администрацијата на Трамп го прекршила Законот за Посе Комитатус, кој забранува користење на војската за цивилни полициски активности.

Тужбата ја поднесе избраниот јавен обвинител на Вашингтон, Брајан Швалб, кој рече дека распоредувањето на Националната гарда за полициски цели било „непотребно и несакано“ и „опасно и штетно“ за жителите на градот.

– Ниеден американски град не треба да има војска што патролира по неговите улици, особено не војска од друга држава, која не одговара пред жителите и нема обука за локално спроведување на законот. Денес е Вашингтон, но утре може да биде кој било друг град. Ја поднесовме оваа тужба за да ставиме крај на ова незаконско федерално пречекорување на овластувањата – рече Швалб.

Во тужбата се наведува дека „невидени и незаконски постапки“ на федералната власт предизвикале „непоправлива штета“ преку повреда на правото на градот на самоуправување, поттикнување недоверба кон локалната полиција и преку намалување на бизнисот и туризмот.

Федералниот суд во Калифорнија пресуди: Администрацијата на Трамп незаконски распореди војска во Лос Анџелес