Екипта на Вардар, без поголеми проблеми ја забележа втората победа во новата сезона од Суперлигата, откако денеска славеше на гостувањето во Битола против вториот тим на Еурофарм Пелистер со убедливи 34-19.

„Црвено-црните“ мечот го решија уште во првото полувреме, кое го добија со 18-7, по што продолжението повеќе наликуваше на сериозен тренинг отколку на натпревар од домашниот шампионат. Со оваа победа, Вардар ја прекина импресивната серија на Еурофарм Пелистер 2 од 25 натпревари без пораз, серија која започна минатата сезона во Првата лига и продолжи со триумф во првото коло оваа година.

Боно беше најпрецизен во редовите на Вардар со шест погодоци, а уште петмина играчи се запишаа со по четири гола. Кај битолчани, Белистојановски беше најрасположен со пет погодоци.

Во вториот натпревар од денешната програма, екипата на Прилеп во вистински трилер успеа да го совлада Куманово со 33-32 и да стигне до важни бодови на домашен терен.