Моментно највлијателната тренерска школа која владее со ракометна Европа е онаа која доаѓа од шпанскиот клуб Валјадолид. Дел од приказната за Валјадолид е поврзана со Вардар и со македонскиот ракомет. Добар дел од успесите што ги постигна во последно време Вардар и македонската репрезентација се врзани за тренерите што потекнуваат од школата на Валјадолид.

Европскиот шампион Вардар, Пари Сен Жермен и Пик Сегед, три европски ракометни великани, се предводени од тројца тренери што произлегуваат од таа школа. Давид Писонеро, Раул Гонзалес и Хуан Карлос Пастор ќе ги предводат и претстојната сезона своите клубови, кои се во најтесниот избор за освојување на Лигата на шампионите.

Тројцата тренери имаат сличен систем на работа, секој со своја идеја, но со ист корен, што доминира повеќе години во европскиот ракомет.

– Карактерот, системот и начинот на тренирање. Тоа нè обединува сите нас – вели Раул Гонзалес, кој го предводеше Вардар до првата европска титула, а беше и селектор на Македонија.

– На луѓето им се допаѓа како работиме. Сакаат ред и сакаат да победуваат. Со нас победуваат – вели Пастор.

– Клучно за се беше Светското првенство 2005 година. Тогаш покажавме дека она што ние го работиме и сега, функционира – вели сегашниот тренер на Вардар, Давид Писонеро. На тоа СП Шпанија стана светски првак, првпат, а тимот од клупата го предводеше Пастор. Тој го водеше шпанскиот тим и до медал од ЕП и од ЛОИ.

Раул и Писонеро беа играчи во Валјадолид, предводени од Пастор кој долго го водеше овој клуб пред да ја прифати понудата на Пик Сегед. Писонеро сезонава ја презеде палката во Вардар од Роберто Гарсија Парондо, кој е уште еден тренер од школата на Валјадолид. Писонеро вели дека не се плаши од предизвикот да го води европскиот шампион, што ќе му е прва задача од ваков калибар.

– Не се плашам од предизвикот. Мојата работа всушност ми е како хоби. Сакам да дадам се од себе и да придонесам. Прва задача во Вардар ми е да се поврзам со тимот – вели новиот предводник на Вардар.

– Клубот направи добра работа што го задржа костурот и тимот е на исто ниво како и досега. Мислам дека треба мали промени да се направат и да се продолжи во истата насока. Засега тимот е тој што го имаме. Имам други работи да направам да ја склопам сложувалката – вели Писонеро, кој вчера го имаше првиот тренинг на стартот на подготовките во Скопје.

„Извоз“ од школата на Валјадолид е и Давид Дејвис, стручњак што го знаеме од ЖРК Вардар и од РК Вардар. Тој сега е на чело на унгарски Веспрем. Парондо, кој го водеше Вардар до трофејот во ЛШ минатата сезона, сега е селектор на Египет.

Листата на тренери со потекло од Валјадолид од сезонава е со уште едно познато име, Чема Родригез, шпански ракометен ас, кој ќе му биде асистент на селекторот на Унгарија, Иштван Гулјаш. Родригез паралелно ќе игра и во француски Саран.