Утре истекува рокот за опсервација на кучето што усмрти дете во скопската населба Пинтија. Кучето беше под опсервација за беснило, иако во државава беснилото е искоренето од 2012 година. За последен пат кај нас истата година е лоцирана мачка со беснило во Радовиш. Од Агенцијата за храна пред два дена изјавија дека под опсервација се две кучиња од истиот сопственик, а рокот истекува утре.

-Двете кучиња од расата булмастиф, кои на 11.04.2023 година учествуваа во несреќата во која до смрт беше искасано осум годишно момче во скопската населба Пинтија, по издаден налог од официјален ветеринар, се уште се наоѓаат под петнаесетдневен надзор за болеста беснило кој во Центарот за дресура на Министерството за внатрешни работи во Хиподром го спроведува доктор по ветеринарна медицина- велат од Агенцијата за храна и ветеринарство. Согласно одредбите од Законот за здравствена заштита и благосостојба на животните и Годишната наредба за здравствена заштита на животните за 2023 година, кучињата ќе останат под надзор до крајот на оваа работна недела.

-По завршувањето на овој пориод зависно од тоа дали во овој временски период ќе појават симптоми на болеста или не, по завршување на опсервацијата ќе се спроведе тест за социјализација од страна на овластени лица од Агенцијата за храна и ветеринарство. Врз основа на тестот ќе се утврдуваат и дополнителни мерки, доколку тоа го наложи констатираната фактичка состојба- велат во АХВ.