Министрите за надворешни работи на ЕУ утре за време на неформален состанок во Копенхаген за прв пат ќе разговараат за плановите за инвестирање на замрзнатите руски средства во поризични инвестиции, бидејќи Европската комисија изготвува шема за префрлање на речиси 200 милијарди руски средства за обнова на Украина по војната, изјавија за Политико неколку неименувани европски претставници.

Функционерите изјавија дека размислуваат за инвестирање на руските замрзнати средства во поризични инвестиции со цел да се постигне поголема добивка што ќе биде префрлена во Украина, како и со цел да се зголеми притисокот врз Русија.

Претседателката на ЕК, Урсула фон дер Лајен, изјави во четврток дека продолжува ангажирањето во инвестирањето на руските замрзнати средства со цел да се инвестира профитот во повоената обнова на Украина.

Со оглед на тоа што Украина се соочува со проценет буџетски дефицит од осум милијарди евра во 2026 година, земјите од ЕУ бараат нови идеи за да продолжат со финансирање на земјата, според порталот од Брисел.