Во светските метрополи има тренд на „откопување“ на каналите и зазеленување на подрачјето каде што природно тече вода за разубавување на просторот, за жителите да имаат катче за одмор и релаксација на жителите и најважно – за климатска отпорност на градовите. Ова е реакцијата на велосипедистите од групата „На точак“ откако Град Скопје деновиве се пофали дека е во тек реализацијата на мегапроект за изградба, регулација и покривање на Усјанскиот канал.

Според градоначалничката Данела Арсовска, на овој начин, со покривање на каналот се решава еден од најголемите еколошки и комунални проблеми во Скопје, а покрај тоа ова е реализација и на еден од ветените проекти во нејзината програма „За модерно Скопје“.

Со овој проект се разрешува еден од најголемите комунални и еколошки проблеми во Скопје, кој има директно влијание на жителите што со децении потенцираат дека овој канал претставува потенцијална опасност од ширење на заразни болести. Покривањето на овој канал пред локалните жители е ветувано со години, а сега овој проект е реалност – рече градоначалничката Арсовска.

Таа информира дека проектот за регулација и покривање на Усјанскиот канал ќе се реализира во неколку фази, а во првата фаза се гради, уредува и се покрива каналот во должина од 1.300 метри.

Од „На точак“ сметаат дека во Скопје се прават истите грешки што метрополите ги правеле во минатиот вел, па наместо каналот да биде преуреден и раззеленет, да биде уреден со пешачки и велосипедски патеки покрај него, покрај вода, Град Скопје го става во цевки. Оттаму посочуваат дека покрај отворени канали има пониска температура, природно струење на воздухот и уште многу други предности што се критични во „бетонираните“ градови и битни при денешните климатски промени.

Наводно се решава проблемот со ризикот од заразни болести, но воопшто не се насочува на причината: нелегални приклучоци на канализациски цевки, недозволено одлагање отпад, ништо од тоа не решава! Туку се одлучува за „шминка“. Наместо да се насочува на причините и да ги решава проблемите со загадувањето, Градот наместо мала рекичка креира канализациска цевка – реагираат од „На точак“.

Но, за скопјани коишто живеат во близина на Усјанскиот канал ова е конечно решение за нивната мака. Тие со години бараат решение од надлежните, се жалат на неподносливата смрдеа, на купиштата ѓубре. Со години укажуваа дека се сомневаат дека од многу погони во каналот се испуштаат фекалии во каналот. Но досега, во изминатава деценија и повеќе не се направи ништо конкретно за да се реши нивниот проблем. Надлежните одвреме-навреме го чистеа каналот од насобраното ѓубре и активностите завршуваа тука. Некои од градските и општинските градоначалници тврдеа дека каналот не смее да се затвори затоа што служи да ги собира атмосферските води.

Со години жителите на Лисиче се обидуваа да најдат решение за овој проблем кај сите претходни градоначалници на Град Скопје и на Општина Аеродром, некои нè убедуваа дека е невозможно покривање на овој канал, иако смрдеата беше ужасна особено во лето, нечист и обраснат канал, депонија за секаков отпад и диво приклучени фекални канализации од домаќинствата. Покривањето на Усјанскиот канал можеби е најзначаен проект во инвестициска смисла за жителите на Лисиче, конечно ќе се реши деценискиот проблем – коментира жител на населбата Лисиче.

Арсовска во предизборната кампања вети уредување на Усјанскиот канал, иако таму не4 се спомнува негово покривање.

 Ќе се изработи ново техничко решение со кое трајно ќе се реши проблемот со проточноста и миризбата на Усјанскиот канал. Преку поставување спортски содржини, патеки за трчање и зазеленување на просторот, овој канал повеќе нема да претставува еколошка опасност за овој дел на Скопје – пишува во програмата „За модерно Скопје“.

Усјанскиот канал е долг 3,6 километри и минува низ селата Сопиште и Усје и низ населбата Горно Лисиче , каде потоа се влева во Вардар. Каналот ги собира атмосферските води од неколку суводолици од планината Водно, како и водите од повеќе атмосферски колектори од територијата на општините Кисела Вода и Аеродром.