Во населбата Даме Груев во тек е реконструкцијата на една од најголемите улици во овој дел, Николај Островски. Од Општина Ѓорче Петров велат дека се  работи за проект вреден 3,2 милиони денари, кој е дел од стратешките заложби на Општината за подобрување на патиштата и условите за живот на граѓаните.

Во моментот  на улицата се изведуваат градежни работи за поставување нов завршен слој асфалт на коловозот во должина од 600 метри, а паралелно се инсталира нова електрична инфраструктура за поставување улично осветлување.

Градоначалникот Александар Стојкоски истакна дека реконструкцијата е директен одговор на барањата на граѓаните и е дел од пошироката визија за унапредување на инфраструктурата во Ѓорче Петров.

Оваа улица е една од најважните во населбата Даме Груев, а нејзиното реновирање значително ќе ја подобри безбедноста и квалитетот на движење за сите учесници во сообраќајот. Продолжуваме со реализација на капитални проекти кои носат вистински промени и ја модернизираат општината, изјави Стојкоски.