Градоначалникот на Општина Центар, Горан Герасимовски информира дека реконструкцијата на улицата Дебарца влегува во завршна фаза и наскоро ќе биде пуштена во употреба.

Тој истакна дека при досегашните активности е поставен нов асфалтен слој на коловозот, а во тек е финалното уредување и прилагодување на тротоарите.

-Сообраќајот на Дебарца ќе се врати во нормала многу скоро. Улицата добива нов лик, а со тоа овозможуваме побезбедно и покомотно движење за сите што живеат и се движат тука- изјави Герасимовски.

Оваа улица е долга 220 метри, каде што е обновена коловозна површина од 1.700 квадратни метри, а се реконструира тротоар на површина од 1.000 квадратни метри.