Украинските сили ја пробија првата руска одбранбена линија во близина на Запорожје по неколкунеделно чистење на земјиштето од мини и очекуваат побрз напредок додека се залагаат за втора, послаба одбранбена линија, потврди генералот Олександр Тарнавски, кој ја предводеше контраофанзивата во јужна Украина.

Тарнавски за британски Обсервер оцени дека Русија посветила 60 отсто од своите ресурси за изградба на првата линија на одбрана, а само 20 отсто за изградба на втората и третата линија на одбраната бидејќи, како што наведе, не очекувала Украинските сили да ја пробијат првата линија.

Тоа би значело дека тие ја пробиле „Линијата Суровикин“, мрежа од мини, бариери и ровови што ги постави поранешниот руски воен командант Сергеј Суровикин за да спречи украинска контраофанзива.

„Сега сме меѓу првата и втората одбранбена линија“, рече Тарнавски, додавајќи дека украинските сили сега го завршуваат уништувањето на руските единици кои обезбедуваат повлекување на руските трупи зад втората одбранбена линија.

Експерт за тенкови по обука, Тарнавски собра импресивно искуство во борба со руските војници откако тие ја преминаа границата во 2022 година. Во септември минатата година, тој беше назначен за командант на силите кои се бореа за ослободување на Керсон; два месеци подоцна градот бил ослободен.

Имаше надежи за сличен брз напредок во летната контраофанзива, чија цел беше да се пробие до Азовското Море, да се отсечат руските трупи во Керсон и окупираниот Крим од другите сили и да се отсечат нивните линии за снабдување. Наместо тоа, нападот се одолговлекуваше со месеци. Бројот на жртви се зголеми, но линиите на фронтот останаа статични, поттикнувајќи незадоволство и критики во западните престолнини кои обезбедуваа оружје и обука.

Генералот ги отфрли критиките, велејќи дека претпочита да ја оценува работата кога е завршена и им се заблагодари на Обединетото Кралство и другите сојузници за поддршката во обуката и оружјето, вклучително и тенковите Челинџер кои веќе се на терен.

Тарнавски истакна дека до сега украинската контраофанзива во регионот на Запорожје била блокирана од мински полиња, а била и забавена поради евакуација на ранетите.

– Кога ја почнавме контраофанзивата… потрошивме повеќе време отколку што очекувавме на деминирање на територијата. За жал, ни беше тешко да ги евакуираме ранетите, што ни го попречи напредокот. Според мене, Русите веруваа дека Украинците нема да ја поминат оваа линија на одбрана. Тие се подготвуваат повеќе од една година. Тие направија се за да биде добро подготвен овој простор – рече тој.

Сега, кога минското поле е пробиено, Русите изгубија голем дел од својата предност.

– Има голема разлика меѓу првата и втората одбранбена линија – рече Тарнавски.

Одбраната го добила името по рускиот генерал Сергеј Суровикин, кој наредил да се создадат три слоја ровови, мински полиња и противтенковски пречки со змејски заби пред контраофанзивата.

– Обично кога ќе поминете низ првата линија, секој следен ред е полесен – изјави Томас Блусиевич, научен соработник во Институтот Хувер. – Но, прашањето е… дали имаат доволно работна сила и дали имаат доволно материјал да го пополнат тој пропуст со одбрана за да се уверат дека Русите нема да започнат контранапад?