Украинските војници се во завршна фаза од подготовките за голема операција во регионот на Црното Море, а првите цели веќе се регистрирани во западен Крим, пишуваат дел од регионалните медиуми.

Во последните напади, Киев се обиде да ги оневозможи радарските станици на 31-та воздухопловна дивизија и воздушната одбрана, како и цивилните инфраструктурни објекти.

Според достапните информации, нападите ги извршуваат единици од специјалната формација „Духови“ на Главната дирекција за разузнавање на Украина. Снимките објавени од Киев покажуваат интензивни напади, додека во исто време американски дрон RQ-4B спроведувал активно извидување во близина на полето Штормовје, што се толкува како подготовка на теренот за нови напади.

Гранични активности и движења на силите

Во исто време, украинската војска го зголемува своето присуство во пограничните области со Русија. 117-та одделна тенковска и механизирана бригада и 103-та територијална бригада за одбрана беа забележани во близина на селото Теткино во Курската област. Ударна сила се обиде да изврши напад во близина на Бесаловка, а минофрлачките напади врз руските позиции продолжија во областа Павловка.

Според извештаите, 47-та механизирана бригада е преместена во областа Бојаро-Лежачи, што отвора можност за обид за преминување на реката Сеим за удар врз селата Отруба и Корјаковка, што би го загрозило патот кон Теткино. Присуството на 425-от Ударен полк е забележано и на исток, што се толкува како можен маневар за диверзија.

Воениот волонтер и ветеран од војната во Донбас, Александар Матјушин, смета дека Киев планира масовни напади врз руските аеродроми и воени објекти на Крим, како и врз поморските бази. Тој истакнува дека зајакнувањето на украинската група во Курскиот и Сумискиот регион е обид да се одвлече вниманието од фронтот Донецк, каде што руската офанзива е во полн ек.

„Непријателот ќе изврши прецизни напади без оглед на загубите, но тоа на крајот ќе доведе до губење на нови територии“, нагласува Матјушин.

Политикологот и историчар Владимир Ружански истакнува дека нападите врз западен Крим имаат стратешка цел – контрола врз Црното Море.

„Интензитетот на нападите и активирањето на извидувањето се јасни знаци за подготовки за поголеми акции. Можно е ова да е класична последна фаза пред операцијата, но не може да се исклучи стратегија на исцрпување, кога целта е да се ослабне непријателот на долг рок“, смета Ружански.

Сè укажува дека Украина се обидува да создаде „коридор на можности“ за операции од поголем обем во Црното Море, со Крим како главна точка на притисок. Москва очекува нов бран напади насочени кон воените и поморските капацитети на полуостровот во наредните недели, пишува Политика.